បុរស ៣នាក់ បានបាត់បង់ជីវិត បន្ទាប់ពីរថយន្តរបស់ពួកគេ បានបើកបរផុតពីស្ពានដែលមិនទាន់សាងសង់ហើយរួចរាល់ និងបានធ្លាក់ទៅបាតទន្លេ ខណៈពេលដែលពួកគេកំពុងប្រើប្រាស់កម្មវិធី Google Maps ដើម្បីស្វែងរកផ្លូវ ក្នុងរដ្ឋ Uttar Pradesh របស់ប្រទេសឥណ្ឌា កាលពីព្រឹកព្រលឹមថ្ងៃទី២៤ ខែវិច្ឆិកា។

យោងតាមប្រព័ន្ធផ្សព្វផ្សាយឥណ្ឌាជាច្រើន បានឲ្យដឹង ជនរងគ្រោះកំពុងធ្វើដំណើរពីទីក្រុង Noida ទៅ Bareilly ដើម្បីចូលរួមពិធីមង្គលការ នៅពេលដែលរថយន្តរបស់ពួកគេបើកផុតស្ពាន ហើយធ្លាក់ចូលទន្លេ Ramganga។ តែសេចក្ដីរយការណ៍ខ្លះបានឲ្យដឹងថា ពួកគេកំពុងធ្វើដំណើរទៅផ្ទះ បន្ទាប់ពីចូលរួមពិធីនោះ។

ពួកគេបានបើកបរតាមការណែនាំនៅលើកម្មវិធីបង្ហាញផ្លូវ ដែលនាំយានយន្តរបស់ពួកគេទៅកាន់ស្ពានដែលមិនមានភ្លើងបំភ្លឺផ្លូវ និងមិនទាន់សាងសង់រួចរាល់ទាំងស្រុង។ សារព័ត៌មាន The Times of India បានរាយការណ៍ថា រថយន្តរបស់ពួកគេបានធ្លាក់ចុះជាង ១៥ម៉ែត្រ មុនពេលបុកនឹងបាតទន្លេ។

រថយន្តដែលកំពិត និងបុរស ៣នាក់ដែលជាប់នៅខាងក្នុងនោះ ត្រូវបានរកឃើញនាព្រឹកថ្ងៃទី២៤ វិច្ឆិកា ដោយអ្នកស្រុកមកពីភូមិ Allapur ដែលបានរាយការណ៍ទៅនគរបាលភ្លាមៗ៕