បទឈប់បាញ់រវាងអ៊ីស្រាអែល និងក្រុមហេសបូឡា របស់លីបង់ បានចូលជាធរមាននៅថ្ងៃពុធ (២៧ វិច្ឆិកា) នេះ បន្ទាប់ពីអាមេរិក និយាយថាភាគីទាំងពីរបានទទួលយកកិច្ចព្រមព្រៀង ដែលសម្របសម្រួលដោយអាមេរិក និងបារាំង ប៉ុន្តែស្នូរសំឡេងកាំភ្លើងត្រូវបានលាន់ឮពាសពេញរដ្ឋធានីបេរូត។

សំឡេងផ្ទុះអាវុធនេះកើតឡើងបន្ទាប់ពីបទឈប់បាញ់ចូលជាធរមាន ហើយគេមិនទាន់ដឹងច្បាស់ថា តើការបាញ់ប្រហារនោះជាការអបអរឬយ៉ាងណា ព្រោះតែសំឡេងកាំភ្លើងក៏ត្រូវបានប្រើដើម្បីប្រាប់អ្នកស្រុកដែលមិនដឹងពីការព្រមានជម្លៀសដោយយោធាអ៊ីស្រាអែល។

សាក្សីរបស់សារព័ត៌មានរ៉យទ័របានឱ្យដឹងថា ជួរដ៏វែងនៃរថយន្តបានចាប់ផ្តើមធ្វើដំណើរទៅកាន់ភាគខាងត្បូងលីបង់ ដែលមានព្រំប្រទល់ជាប់នឹងអ៊ីស្រាអែល បន្ទាប់ពីមានបទឈប់បាញ់នៅព្រឹកថ្ងៃពុធ។

សូមបញ្ជាក់ថា កិច្ចព្រមព្រៀងនេះកំណត់ការបញ្ឈប់អរិភាពរយៈពេល ៦០ថ្ងៃ ដែលក្រុមចរចាពិពណ៌នាថាជាមូលដ្ឋានគ្រឹះនៃបទឈប់បាញ់យូរអង្វែង។ ក្នុងអំឡុងពេលនោះ ក្រុមយុទ្ធជនហេសបូឡា ត្រូវបានគេរំពឹងថានឹងដកថយប្រហែល ៤០គីឡូម៉ែត្រ ពីព្រំដែនអ៊ីស្រាអែល-លីបង់ ខណៈកងកម្លាំងជើងគោកអ៊ីស្រាអែល ដកខ្លួនចេញពីទឹកដីលីបង់៕