ប្អូនស្រីដ៏មានឥទ្ធិពលរបស់មេដឹកនាំកូរ៉េខាងជើង លោក គីម ជុងអ៊ុន កាលពីថ្ងៃអង្គារ បានថ្កោលទោស ខិត្តប័ណ្ណ«ញុះញង់ផ្នែកនយោបាយ» ដោយចោទប្រកាន់កូរ៉េខាងត្បូងថា បានបញ្ជូនពួកវា ឆ្លងកាត់ព្រំ ដែន។

ទីភ្នាក់ងារព័ត៌មានមជ្ឈិមរបស់កូរ៉េខាងជើង បានដកស្រង់សម្តីលោក ស្រី គីម យ៉ូចុង ( Kim Yo-jong) ដែលបាននិយាយនៅក្នុងសេចក្តីថ្លែងការណ៍មួយថា៖«ខិត្តប័ណ្ណញុះញង់ផ្នែកនយោបាយជាច្រើនប្រភេទ និងវត្ថុកខ្វក់ដែលត្រូវបានបញ្ជូនដោយប្រជាជនកូរ៉េខាងត្បូង ត្រូវបានទម្លាក់ម្តងទៀត នៅក្នុងតំបន់ផ្សេងៗគ្នានៅជិតព្រំដែនភាគខាងត្បូងនៃប្រទេសកូរ៉េខាងជើង» កាលពីថ្ងៃអង្គារ។

លោកស្រី បាននិយាយថា កងកម្លាំងសន្តិសុខ បានបិទតំបន់ដែលរងផលប៉ះពាល់ ហើយកំពុងស្វែងរក ប្រមូល និងយកសម្ភារទាំងនោះ ទៅបោះចោល។

សេចក្តីថ្លែងការណ៍ បាននិយាយថា៖«យើងសូមថ្កោលទោសយ៉ាងដាច់អហង្ការចំពោះទង្វើគួរឲ្យស្អប់ខ្ពើមរបស់ប្រជាជនកូរ៉េខាងត្បូង ដែលបានបង្កហេតុនៃការបំពុលទឹកដីដែលមិនអាចរំលោភបានរបស់កូរ៉េខាងជើង ដោយចែកចាយខិតប័ណ្ណញុះញង់ផ្នែកនយោបាយ និងការសមគំនិតប្រឆាំងនឹងកូរ៉េខាងជើងជាថ្មី»។

កាលពីសប្តាហ៍មុន លោក គីម ជុងអ៊ុន បានចោទប្រកាន់កូរ៉េខាងត្បូងថា បានបញ្ជូនខិត្តប័ណ្ណប្រឆាំង ក្រុងព្យុងយ៉ាង ទៅកាន់ប្រទេសកូរ៉េខាងជើង ហើយបានព្រមានថា កូរ៉េខាងត្បូង នឹងរងផលវិបាកដ៏ធ្ងន់ធ្ងរ។ សកម្មភាពបែបនេះ ត្រូវបានធ្វើឡើង បន្ទាប់ពីកូរ៉េខាងជើង បានបង្ហោះបាឡុងផ្ទុកសំរាមឆ្លងកាត់ព្រំដែន ចូលទៅកូរ៉េខាងត្បូង។