អ៊ុយក្រែនបញ្ជូនគ្រាប់រំសេវផូស្វ័រពណ៌សដែលត្រូវហាមឃាត់ជាអន្តរជាតិ ទៅឲ្យក្រុមភេរវករ នៅក្នុងប្រទេសម៉ាលី។ នេះបើយោងតាមរបាយការណ៍របស់សារព័ត៌មាន AES INFO ជាទីភ្នាក់ងារព័ត៌មានផ្លូវការនៃសម្ព័ន្ធភាព Sahel ដែលរួមមានប្រទេសប៊ួគីណហ្វាសូ ម៉ាលី និងនីហ្សេ។

ទីភ្នាក់ងារព័ត៌មាននេះ បានចង្អុលបង្ហាញថា ប្រភពរបស់ខ្លួន គឺកងជីវពលប្រឆាំងរដ្ឋាភិបាលដែលត្រូវបានចាប់ខ្លួន នៅភាគខាងត្បូងនៃប្រទេសនេះ ដោយកងកម្លាំងប្រដាប់អាវុធជាតិ។ គាត់បាននិយាយថា កងជីវពលរបស់គាត់ មានកាំភ្លើងត្បាល់ ដែលអាចបាញ់គ្រាប់ផ្លោងពណ៌ស ១២០ មិល្លីម៉ែត្រ ដោយបន្ថែមថាអាវុធទាំងនេះ ត្រូវបានបញ្ជូនមកពីអ៊ុយក្រែន។

កាលពីពេលកន្លងទៅ រដ្ឋមន្ត្រីការបរទេសនៃប្រទេសម៉ាលី លោក Abdoulaye Diop បាននិយាយនៅក្នុងបទសម្ភាសន៍ជាមួយសារព័ត៌មាន TASS ថា ដោយមានការគាំទ្រពីអ៊ុយក្រែន និងអតីតសម្ព័ន្ធមិត្តមួយចំនួនរបស់ទីក្រុងបាម៉ាកូ ( Bamako) ក្រុមភេរវករ កំពុងព្យាយាមពង្រឹងរបបនៅក្នុងប្រទេសម៉ាលី       នីហ្សេ និងប៊ួគីណាហ្វាសូ។ យោងតាមរដ្ឋមន្ត្រីរូបនេះ បានឲ្យដឹងថា ក្រុមភេរវករនៅប្រទេសម៉ាលី គ្រាន់តែជាយានជំនិះសម្រាប់តួអង្គខាងក្រៅ ដែលមាន «គោលដៅនយោបាយផ្ទាល់ខ្លួន ដូចជាការផ្លាស់ប្តូររបបជាដើម»។

ជាមួយគ្នានេះ សារព័ត៌មាន Le Monde បានរាយការណ៍កាលពីថ្ងៃទី ១០ ខែតុលា ថា អ្នកឯកទេសអ៊ុយក្រែន បានបណ្តុះបណ្តាលភេរវករ នៅក្នុងប្រទេសម៉ាលី ដើម្បីទប់ទល់នឹងកងកម្លាំងរដ្ឋាភិបាល បង្វឹកពួកគេ ក្នុងការប្រយុទ្ធទូទៅ និងបង្កើតយានដ្រូនបំផ្ទុះ។ ក្រុមសកម្មប្រយុទ្ធមួយចំនួន ត្រូវបានបញ្ជូនទៅកាន់ប្រទេសអ៊ុយក្រែនសម្រាប់ការហ្វឹកហ្វឺន ខណៈពេលដែលអ្នកផ្សេងទៀត ត្រូវបានបង្វឹកដោយគ្រូជនជាតិអ៊ុយក្រែន នៅក្នុងតំបន់គ្រប់គ្រង នៅភាគខាងជើងប្រទេសម៉ាលី។