បណ្ដាមេដឹកនាំពិភពលោក បានស្វាគមន៍កិច្ចព្រមព្រៀងបទឈប់បាញ់ រវាងប្រទេសអ៊ីស្រាអែល និងក្រុមសកម្មប្រយុទ្ធលីបង់ គឺក្រុមហេសបូឡា ដែលបានចូលជាធរមាន នាព្រឹកថ្ងៃពុធ (ទី២៧ ខែវិច្ឆិកា) នេះ (នៅម៉ោង ២ ម៉ោងសកល)។

ជាដំបូងគេ សហរដ្ឋអាមេរិក និងបារាំង បានមានប្រតិកម្មភ្លាមៗ ចំពោះបទឈប់បាញ់នេះ ដោយប្រធានាធិបតីអាមេរិក លោក Joe Biden និងប្រធានាធិបតីបារាំង លោក Emmanuel Macro បានលើកឡើងនៅក្នុងសេចក្តីថ្លែងការណ៍រួមថា៖ «សេចក្តីប្រកាសថ្ងៃនេះ នឹងបញ្ឈប់ការប្រយុទ្ធគ្នា នៅក្នុងប្រទេសលីបង់ ហើយធានាឲ្យប្រទេសអ៊ីស្រាអែលមិនមានការគំរាមកំហែងពីក្រុមហេសបូឡា និងអង្គការភេរវករផ្សេងទៀត ដែលកំពុងប្រតិបត្តិការពីប្រទេសលីបង់»។ 

សម្រាប់លោក Biden ផ្ទាល់ ប្រធានាធិបតីជិតផុតអាណត្តិរូបនេះ បានស្វាគមន៍កិច្ចព្រមព្រៀងនេះថា ជា «ដំណឹងល្អ» ហើយថែមទាំងបាននិយាយថា សហរដ្ឋអាមេរិកនឹងដឹកនាំកិច្ចខិតខំប្រឹងប្រែងថ្មីមួយ ដើម្បីទទួលបានបទឈប់បាញ់ រវាងអ៊ីស្រាអែល និងក្រុមសកម្មប្រយុទ្ធហាម៉ាសប៉ាឡេស្ទីន នៅតំបន់ហ្កាហ្សា។ ហើយលោក Macron ក៏បានបញ្ជាក់បន្ថែមពីលើដែរថា បទឈប់បាញ់នៅលីបង់នេះ គួរតែ «បើកផ្លូវ» ដល់ការបញ្ចប់សង្រ្គាម នៅតំបន់ហ្កាហ្សា។

ចំណែកនាយករដ្ឋមន្ត្រីអ៊ីស្រាអែល លោក Benjamin Netanyahu បានថ្លែងអំណរគុណដល់ប្រធានាធិបតីអាមេរិក លោក Biden សម្រាប់ «ការចូលរួមរបស់លោកក្នុងការធានាបានកិច្ចព្រមព្រៀងបទឈប់បាញ់នេះ»។ ហើយយោងតាមការិយាល័យរបស់លោក បានឲ្យដឹងថា លោក Netanyahu បានប្រាប់លោក Biden អំឡុងពេលសន្ទនារតាមទូរសព្ទថា លោកបានកោតសរសើរ ចំពោះ «ការយល់ដឹងរបស់មេដឹកនាំសហរដ្ឋអាមេរិក ដែលថា អ៊ីស្រាអែលនឹងរក្សានូវសេរីភាពនៃវិធានការរបស់ខ្លួន ក្នុងការអនុវត្តបទឈប់បាញ់នេះ»។ 

រីឯនាយករដ្ឋមន្ត្រីលីបង់ លោក Najib Mikati បាននិយាយថា បទឈប់បាញ់នេះ គឺជា «ជំហានដ៏សំខាន់» ក្នុងការឆ្ពោះទៅរកការស្តារស្ថិរភាពក្នុងតំបន់ឡើងវិញ។ មិនខុសគ្នាដែរ អ៊ីរ៉ង់ ដែលជាអ្នកគាំទ្រក្រុមហេសបូឡា និងក្រុមហាម៉ាស បានស្វាគមន៍ការបញ្ចប់នៃ «ការលុកលុយ» របស់អ៊ីស្រាអែល នៅលីបង់ បន្ទាប់ពីបទឈប់បាញ់នេះចូលជាធរមាន។ 

រដ្ឋមន្ត្រីការបរទេសអាល្លឺម៉ង់ លោកស្រី Annalena Baerbock បានស្វាគមន៍កិច្ចព្រមព្រៀងនេះ ដោយសាទរថា ជា «រស្មីនៃក្តីសង្ឃឹម សម្រាប់តំបន់ទាំងមូល»។ នាយករដ្ឋមន្ត្រីអង់គ្លេស លោក Keir Starmer បានសរសើរបទឈប់បាញ់នេះថា នឹង «ផ្តល់វិធានការសង្គ្រោះមួយចំនួនដល់ប្រជាជនស៊ីវិល» ទាំងអ៊ីស្រាអែល និងលីបង់។ 

ប្រធានសហភាពអឺរ៉ុប លោកស្រី Ursula von der Leyen បានសាទរចំពោះ «ដំណឹងផ្ដល់កម្លាំងចិត្ត» នៃបទឈប់បាញ់នេះ ដោយនិយាយថា វានឹងបង្កើន «សន្តិសុខ និងស្ថិរភាពផ្ទៃក្នុង» របស់ប្រទេសលីបង់។ មន្ត្រីជាន់ខ្ពស់អង្គការសហប្រជាជាតិ ក៏បានស្វាគមន៍កិច្ចព្រមព្រៀងបទឈប់បាញ់នេះដែរ ប៉ុន្តែបានព្រមានថា «ការងារជាច្រើនកំពុងរង់ចាំនៅខាងមុខ» ដើម្បីអនុវត្តកិច្ចព្រមព្រៀងនេះ៕