តំណាងក្រុមនេះ បានប្រាប់សារព័ត៌មាប France-Presse ថា ចលនាប៉ាឡេស្ទីនហាម៉ាស ត្រៀមខ្លួនជាស្រេច ដើម្បីយល់ព្រមលើបទឈប់បាញ់ នៅតំបន់ហ្កាហ្សាស្ទ្រីប បន្ទាប់ពីការប្រកាសបទឈប់បាញ់រវាងអ៊ីស្រាអែល និងលីបង់។

អ្នកនាំពាក្យរូបនេះ បាននិយាយថា៖ «ក្រុមហាម៉ាសបានត្រៀមខ្លួនរួចជាស្រេចសម្រាប់បទឈប់បាញ់មួយ និងកិច្ចព្រមព្រៀងដ៏សំខាន់មួយអំពីការដោះដូរអ្នកទោស»។ លោកបានបន្ថែមថា៖«ការប្រកាសបទឈប់បាញ់ នៅក្នុងប្រទេសលីបង់ គឺជាជ័យជម្នះ និងជាជោគជ័យដ៏សំខាន់សម្រាប់កងកម្លាំងតស៊ូ»។ 

មុននេះ គណៈរដ្ឋមន្ត្រីសង្គ្រាមអ៊ីស្រាអែល បានអនុម័តផែនការសម្រាប់បទឈប់បាញ់នៅលីបង់។ ភ្លាមៗនោះ ប្រធានាធិបតីអាមេរិក លោក ចូ បៃដិន (Joe Biden) បានប្រកាសថា កិច្ចព្រមព្រៀងរវាងអ៊ីស្រាអែល និងចលនាហេសបូឡាដែលមានមូលដ្ឋាននៅប្រទេសលីបង់ ផ្តល់ឲ្យកងកម្លាំងលីបង់គ្រប់គ្រងលើទឹកដីរបស់ពួកគេឡើងវិញ ក្នុងរយៈពេល ៦០ថ្ងៃ។ បន្ទាប់មក កងទ័ពអ៊ីស្រាអែល នឹងដកខ្លួនចេញជាបណ្តើរៗពីទឹកដីលីបង់ ខណៈដែលជនស៊ីវិលមកពីភាគីទាំងសងខាង នឹងអាចត្រឡប់ទៅទីក្រុងរបស់ពួកគេវិញដោយសុវត្ថិភាព ហើយចាប់ផ្តើមសាងសង់ឡើងវិញ។

ស្ថានការណ៍នៅមជ្ឈិមបូព៌ា បានកើនឡើងយ៉ាងខ្លាំង នៅថ្ងៃទី 0៧ ខែតុលា ឆ្នាំ ២០២៣ នៅពេលដែល អ្នកគាំទ្រហាម៉ាសប្រដាប់អាវុធមកពីតំបន់ហ្កាហ្សាស្ទ្រីប បានរំលោភលើទឹកដីអ៊ីស្រាអែល ដោយបានសម្លាប់អ្នករស់នៅតាមព្រំដែន និងចាប់ចំណាប់ថ្នូរជាង ២៤០នាក់។ ជាការសងសឹក អ៊ីស្រាអែលបានបើកប្រតិបត្តិការយោធា នៅក្នុងដែនដីនេះ ដើម្បីបំផ្លាញរចនាសម្ព័ន្ធយោធា និងនយោបាយរបស់ក្រុមហាម៉ាស និងរំដោះចំណាប់ខ្មាំងទាំងអស់។ អរិភាពនៅតំបន់ហ្កាហ្សា បន្តរហូតទល់សព្វថ្ងៃ។