ប្រជាពលរដ្ឋរស់នៅក្នុងទីក្រុងភាគខាងជើង Tinzaouaten របស់ប្រទេសម៉ាលី ដែលធ្លាប់ជួបការប្រយុទ្ធគ្នាដ៏ខ្លាំងក្លាកាលពីខែកក្កដារវាងក្រុមឧទ្ទាម Tuareg និងកងទ័ពគាំទ្រដោយទាហានស៊ីឈ្នួលរុស្ស៊ីនោះ បច្ចុប្បន្នប្រឈមនឹងការរីករាលដាលឆ្លងជំងឺ និងការវាយប្រហារដោយយានដ្រូន បង្ខំឲ្យពលរដ្ឋជាច្រើនរត់ភៀសខ្លួនទៅកាន់ប្រទេសអាល់ហ្សេរី ។

ក្រុមឧទ្ទាម Tuareg គ្រប់គ្រងទីក្រុងនៅតំបន់វាលខ្សាច់ដ៏ធំល្វឹងល្វើយរបស់ប្រទេសម៉ាលី ហើយការបិទផ្លូវពាក់ព័ន្ធនឹងបញ្ហាសន្តិសុខ បានរារាំងការចូលដល់គ្រឿងផ្គត់ផ្គង់ ដូចជាមុង និងឱសថដែលត្រូវការដើម្បីប្រយុទ្ធប្រឆាំងនឹងការរីករាលដាលឆ្លងជំងឺខាន់ស្លាក់ និងជំងឺគ្រុនចាញ់ ។

លោក Ibrahim Ag Tambarayraye គឺជាពលរដ្ឋមួយរូបរស់នៅក្នុងទីក្រុង Tinzaouaten និយាយថា នៅទីនេះ ពួកយើងខ្វះខាតអ្វីៗគ្រប់បែបយ៉ាងទាំងអស់ អ្វីៗទាំងអស់ត្រូវបានបិទសម្រាប់ពួកយើង ឱសថពុំបានមកដល់នោះទេនៅទីក្រុង Tinzaouaten ហើយបច្ចុប្បន្នផ្លូវបានបិទទៀតផង គ្មានអង្គការណាមួយមកជួយពួកយើងនោះឡើយ ។

ក្រុមគ្រូពេទ្យ និងអ្នកស្រុកនៅទីក្រុងព្រំដែនជិតប្រទេសអាល់ហ្សេរី និយាយប្រាប់ទីភ្នាក់ងារព័ត៌មានរ៉យទ័រថា ចាប់តាំងពីជម្លោះផ្ទុះឡើងកាលពីខែកក្កដា ការវាយប្រហាររបស់យានដ្រូន បានសម្លាប់មនុស្សជាច្រើន រួមទាំងកុមារផងដែរ ។

ស្ថានភាពអាក្រក់កាន់តែធ្ងន់ធ្ងរទៅដោយសារទឹកជំនន់អំឡុងរដូវវស្សានៅទូទាំងតំបន់ Sahel របស់អាហ្វ្រិកខាងលិច ដោយបង្ខំឲ្យម៉ាលីប្រកាសដាក់រដ្ឋក្នុងគ្រោះមហន្តរាជាតិកាលពីខែសីហាកន្លងទៅ ហើយនិងពន្យាពេលចាប់ផ្តើមឆ្នាំសិក្សា ។

លោក Moussa Bagayoko គឺជាគ្រូពេទ្យមានមូលដ្ឋាននៅទីក្រុង Tinzaouaten និយាយថា ទីក្រុងមួយនេះ បានងរងគ្រោះដោយសារការរីករាលដាលឆ្លងជំងឺខាន់ស្លាក់ គឺជាជំងឺឆ្លងបាក់តេរីធ្ងន់ធ្ងរ ក៏ដូចជាជំងឺគ្រុនចាញ់ ។

លោកថា ជំងឺគ្រុនចាញ់មានលក្ខណៈពិសេសចំពោះស្ថានភាពឆ្នាំនេះ ដោយអ្នកជំងឺជាច្រើនមានភាពស្លេកស្លាំងធ្ងន់ធ្ងរ ហើយមនុស្សដែលចូលព្យាបាលភាគច្រើន បានសន្លប់ ធ្វើឲ្យមានការសង្ស័យដល់ជំងឺគ្រុនចាញ់ពាក់ព័ន្ធនឹងខួរក្បាល ៕