ពលរដ្ឋជម្លៀសខ្លួនរស់នៅក្នុងទីជម្រកនៅទីក្រុង Sidon បានរៀបចំរបស់របររបស់ពួកគេនៅថ្ងៃពុធនេះ ដើម្បីត្រៀមខ្លួនវិលត្រឡប់ទៅកាន់ផ្ទះសម្បែងរបស់ពួកគេវិញនៅតំបន់ភាគខាងត្បូងប្រទេសលីបង់ ក្រោយបទឈប់បាញ់បញ្ចប់ជម្លោះរវាងក្រុមប្រដាប់អាវុធហេសបូឡា និងកងកម្លាំងអ៊ីស្រាអែល បានចូលជាធរមាននៅព្រឹកថ្ងៃពុធនេះ ។

រថយន្តដឹកមនុស្សជម្លៀសខ្លួនចេញពីតំបន់ភាគខាងត្បូងលីបង់ដោយសារការវាយប្រហាររបស់អ៊ីស្រាអែលក្នុងរយៈពេលប៉ុន្មានខែចុងក្រោយនេះ បានចាប់ផ្តើមវិលត្រឡប់ទៅកាន់តំបន់ភាគខាងត្បូងវិញ ។

ក្រុមអ្នកធ្វើសេចក្តីរាយការណ៍របស់ទីភ្នាក់ងារព័ត៌មានរ៉យទ័រ បានមើលឃើញរថយន្តរាប់សិបគ្រឿង ចាកចេញពីទីក្រុងកំពង់ផែ Sidon នៅភាគខាងត្បូងទីក្រុងបេរូត កាលពីវេលាម៉ោង ៤ព្រឹកទាបភ្លឺ និងធ្វើដំណើរចូលទៅជ្រៅនៅតំបន់ភាគខាងត្បូងលីបង់ ។

កងទ័ពលីបង់ដែលមានការងាជួយឲ្យមានបទឈប់បាញ់និយាយនៅក្នុងសេចក្តីថ្លែងការណ៍នាថ្ងៃពុធនេះថា ពួកគេត្រៀមខ្លួនដាក់ពង្រាយទៅកាន់តំបន់ភាគខាងត្បូងប្រទេសលីបង់ ។

យោធាលីបង់ បានស្នើសុំឲ្យពលរដ្ឋរស់នៅតាមភូមិជាប់ព្រំដែនពន្យាពេលការវិលត្រឡប់ទៅផ្ទះសិន រហូតដល់យោធាអ៊ីស្រាអែលដែលធ្វើសង្រ្គាមជាមួយក្រុមហេសបូឡាជាច្រើនលើកច្រើនសារ និងរុលចូលទឹកដីលីបង់ចម្ងាយ ៦គ.ម ដកទៅវិញអស់ ។

បទឈប់បាញ់ដែលរៀបចំឡើងដោយសហរដ្ឋអាមេរិក និងបារាំង សន្យាបញ្ចប់ជម្លោះនៅតាមព្រំដែនអ៊ីស្រាអែល និងលីបង់ ដែលបានសម្លាប់មនុស្សរាប់ពាន់នាក់ ចាប់តាំងពីវាផ្ទុះឡើងដោយសារសង្រ្គាមនៅតំបន់ហ្កាហ្សាកាលពីឆ្នាំមុន ៕