ភ្នំពេញ ៖ ឯកឧត្តម ហ៊ុន ម៉ានី សមាជិកនៃរដ្ឋសភា និងជាសហស្ថាបនិក នៃគម្រោងស្អាត នឹងអញ្ជើញបើកដំណើរការយុទ្ធនាការភ្នំពេញស្អាត ឆ្នាំ២០២១ តាមរយៈប្រព័ន្ធពីចម្ងាយ នាថ្ងៃទី១ ខែវិច្ឆិកា ឆ្នាំ២០២១ខាងមុខនេះ ក្រោមទិសស្លោកថ្មី គឺ «ទម្លាប់ថ្មី ទម្លាប់ស្អាត»។
បើយោងតាមការបញ្ជាក់របស់គម្រោងស្អាត ឲ្យដឹងថា យុទ្ធនាការភ្នំពេញស្អាត ដែលជាផ្នែកមួយនៃគម្រោងស្អាត បានធ្វើឡើងជារៀងរាល់ឆ្នាំ ក្នុងអំឡុងនៃខែវិច្ឆិកា។ ឆ្នាំនេះ គឺជាឆ្នាំទី៥ នៃយុទ្ធនាការភ្នំពេញស្អាត ដែលនឹងប្រព្រឹត្តទៅពេញមួយខែវិច្ឆិកា។ ទស្សនាទាននាំមុខនៃគម្រោងស្អាត ដែលបង្កើតឲ្យមាន យុទ្ធនាការភ្នំពេញស្អាត គឺសំរាម មិនមែនជារបស់នរណាម្នាក់ ពោលគឺវាកើតចេញពីយើងទាំងអស់គ្នា ដែលទាមទារឲ្យមានការចូលរួមចំណែកទទួលខុសត្រូវរួមគ្នា ក្នុងទិសដៅរួម គឺ«ស្អាត» សំដៅលើ «គ្មានសំរាមពាសវាលពាសកាល»។
សូមសង្កត់ធ្ងន់ផងដែរថា យុទ្ធនាការភ្នំពេញស្អាត ឆ្នាំ២០២១ បានដាក់ចេញនូវទិសស្លោកថ្មីប្រចាំឆ្នាំ គឺ «ទម្លាប់ថ្មី ទម្លាប់ស្អាត» ដែលជាឃ្លាគន្លឹះវិវត្ត និងកែសម្រួលពីពាក្យស្លោកចាស់កាលពីឆ្នាំ២០២០ គឺ«ស្អាតជាទម្លាប់ថ្មី» ក្រោមទិសដៅពង្រឹងស្មារតីបន្ថែមទៀត នូវការអនុវត្តឲ្យបាបខ្ជាប់ខ្ជួនទៅតាមការណែនាំរបស់ក្រសួងសុខាភិបាល សេចកី្តប្រកាសពីអង្គការសុខភាពពិភពលោក (WHO) តាមរយៈការបន្តលើកទឹក ចិត្ត ឲ្យមនុស្សយុគសម័យថ្មីប្រតិបតិ្តនូវវិធានការសុខាភិបាល និងអនាម័យ ជាពិសេសស្មារតីលើកកម្ពស់មេត្រីភាព និងសោភ័ណភាពបរិស្ថាន ពោលគឺ«ការទុកដាក់ និងគ្រប់គ្រងសំរាមឲ្យបានត្រឹមត្រូវ» ដែលជាបេសកកម្ម ចម្បង របស់គម្រោងស្អាត៕
អត្ថបទ រដ្ឋា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
