មេបញ្ជាការកងទ័ពជើងទឹកអ៊ីរ៉ង់ លោកឧត្តមនាវីឯក Shakhram Irani បាននិយាយថា កងទ័ពជើងទឹកអ៊ីរ៉ង់ បានត្រៀមខ្លួនរួចជាស្រេច ដើម្បីអមដំណើរនិងការពារនាវាបរទេសពីចោរសមុទ្រ នៅក្នុងសមុទ្រក្រហម ដោយមិនគិតថ្លៃ។

លោក Irani បាននិយាយនៅក្នុងបទសម្ភាសន៍ជាមួយសារព័ត៌មាន Tasnimថា៖«ក្នុងអំឡុងពេលកិច្ចប្រជុំមួយ មេបញ្ជាការកងទ័ពជើងទឹកបរទេសម្នាក់ បានមករកយើង ហើយនិយាយថា វាមិនមានសុវត្ថិភាពនៅក្នុងតំបន់[មជ្ឈិមបូព៌ា]ទេ។ ខ្ញុំបានឆ្លើយថា ប្រសិនបើអ្នកមានការព្រួយបារម្ភ អ្នកអាចសុំឲ្យសាធារណរដ្ឋឥស្លាមអ៊ីរ៉ង់ អមដំណើរអ្នក[នៅក្នុងសមុទ្រក្រហម] យើងនឹងមិនគិតថ្លៃសម្រាប់រឿងនេះទេ ព្រោះវាពិតជាការបម្រើដល់សហគមន៍អន្តរជាតិ»។  

យោងតាមឧត្តមនាវីឯករូបនេះ នាវាយោធាអ៊ីរ៉ង់តែងតែអមដំណើរនាវាពាណិជ្ជកម្មរបស់សាធារណរដ្ឋនេះនៅសមុទ្រ មិនមែនដោយសារតែការព្រួយបារម្ភថា ក្រុមហ៊ួទី អាចវាយប្រហារលើពួកគេទេ ប៉ុន្តែដើម្បីការពារពួកគេពីក្រុមចោរសមុទ្រ។

លោកឧត្តមនាវីឯក ក៏បានបង្ហាញពីផែនការរបស់ទីក្រុងតេអេរ៉ង់ ក្នុងងការបង្កើតទីបញ្ជាការកងទ័ពជើងទឹកដាច់ដោយឡែកពីគ្នា នៅក្នុងមហាសមុទ្រឥណ្ឌា ប៉ាស៊ីហ្វិក និងមហាសមុទ្រអាត្លង់ទិក។ ការសម្រេចចិត្តនេះ ត្រូវបានធ្វើឡើង ដោយសារនាវាអ៊ីរ៉ង់យ៉ាងច្រើនដែលត្រូវការជំនួយ មានវត្តមានក្នុងដែនទឹកទាំងនេះ។ ភារកិច្ចចម្បងនៃទីបញ្ជាការកងទ័ពជើងទឹកទាំងនេះ គឺត្រូវប្តូរវេននាវិក និងចាត់តាំងនាវាយោធាទៅកាន់តំបន់ផ្សេងៗ។