ប្រធានក្រុមប្រឹក្សាសហព័ន្ធលោក ស្រី Valentina Matviyenko បាននិយាយថា សមាជិកព្រឹទ្ធសភាសម្តែងការគាំទ្រជាឯកច្ឆន្ទចំពោះសកម្មភាពរបស់ប្រធានាធិបតី វ្ល៉ាឌីមៀ ពូទីន ដើម្បីការពារអធិបតេយ្យភាពរបស់ប្រទេស ដើម្បីឆ្លើយតបទៅនឹងការឈ្លានពានរបស់គូប្រជែងរបស់រុស្ស៊ី ដោយអត្ថាធិប្បាយលើការប្រើប្រាស់នាពេលថ្មីៗនេះនៃមីស៊ីលបាលីស្ទីករយៈចម្ងាយមធ្យម Oreshnik។

លោកស្រី Matviyenko បាននិយាយថា៖«ខ្ញុំដឹងថា សមាជិកព្រឹទ្ធសភាជាច្រើន បានបញ្ចេញមតិលើប្រធានបទនេះ។ យើងគាំទ្រជាឯកច្ឆន្ទចំពោះសកម្មភាពរបស់លោកប្រធានាធិបតីរុស្ស៊ី និងជាអគ្គមេបញ្ជាការកំពូល ដើម្បីការពារអធិបតេយ្យភាពរបស់ប្រទេស និងធានាសន្តិសុខរបស់ខ្លួន»។

លោកស្រី បានកត់សម្គាល់ថា ក្រុមប្រឹក្សាសហព័ន្ធ មានឆន្ទៈក្នុងការគាំទ្របន្ថែមទៀតនូវសកម្មភាពដែលមានគោលបំណងការពារប្រទេសរុស្ស៊ី។ លោស្រីប្រធានសភា បានបញ្ចប់ថា៖«ខ្ញុំសូមអរគុណអ្នកទាំងអស់គ្នាចំពោះជំហររបស់អ្នក។

ប្រធានាធិបតីរុស្ស៊ី លោក វ្ល៉ាឌីមៀ ពូទីន បានថ្លែងកាលពីថ្ងៃទី ២១ ខែវិច្ឆិកាថា សហរដ្ឋអាមេរិក និងសម្ពន្ធមិត្តណាតូ បាននិយាយមុននេះថា ពួកគេបានអនុញ្ញាតឲ្យប្រើប្រាស់អាវុធដែលមានភាពជាក់លាក់កម្រិតខ្ពស់រយៈចម្ងាយឆ្ងាយ បន្ទាប់ពីនោះ មីស៊ីលអាមេរិក និងអង់គ្លេស បានវាយប្រហារទីតាំងយោធារុស្ស៊ី នៅក្នុងតំបន់ Kursk និង Bryansk។ 

លោកបាននិយាយថា រុស្ស៊ីបានឆ្លើយតបទៅនឹងការវាយប្រហារទាំងនេះ ដោយដំបូងឡើយដោយប្រើមីស៊ីលបាលីស្ទីកលរយៈចម្ងាយមធ្យម Oreshnik ថ្មីបំផុតប្រឆាំងនឹងរោងចក្រឧស្សាហកម្មការពារជាតិរបស់អ៊ុយក្រែន រោងចក្រ Yuzhmash នៅទីក្រុង Dnepr (អតីតទីក្រុង Dnepropetrovsk) ។ មេដឹកនាំរុស្ស៊ី បានសង្កត់ធ្ងន់ថា គោលនយោបាយបង្កហេតុរបស់ប្រទេសលោកខាងលិច អាចមានផលវិបាកធ្ងន់ធ្ងរ ប្រសិនបើជម្លោះនេះ កាន់តែកើនឡើងថែមទៀត។