បេក្ខជនខាងក្រុមស្តាំនិយមជ្រុល ដែលទទួលបានជ័ជម្នះដ៏គួរឲ្យភ្ញាក់ផ្អើលនៅក្នុងការបោះឆ្នោតជ្រើសរើសប្រធានាធិបតីរូម៉ានីជុំទី១ បានបដិសេធនូវពាក្យ ដែលថា រូបលោកចង់ចាកចេញពីអង្គការណាតូ (NATO) និងសហភាពអឺរ៉ុប (EU) ដោយហាក់ដូចជាបានដកនូវគោលជំហរមួយចំនួនរបស់លោក ចំពេលមានការតវ៉ា ចំពោះជោគជ័យរបស់លោក។

ដោយទទួលការគាំទ្រតិចតួចប៉ុណ្ណោះ នៅក្នុងការស្ទង់មតិ មុនការបោះឆ្នោតជុំទី១ កាលពីថ្ងៃអាទិត្យចុងសប្ដាហ៍កន្លងមក អ្នកនយោបាយស្តាំនិយមឯករាជ្យ លោក Calin Georgescu វ័យ ៦២ឆ្នាំ បានឈានទៅរកជ័យជម្នះដ៏គួរឲ្យភ្ញាក់ផ្អើល ដែលបង្កើតឲ្យមានសំណួរយ៉ាងច្រើន ជុំវិញថា តើលទ្ធផលដ៏មិនគួរឲ្យជឿបែបនេះ កើតមានឡើងដោយរបៀបណា។

លោកនឹងត្រូវប្រឈមជាមួយគូប្រជែងកណ្តាលនិយម លោកស្រី Elena Lasconi នៅក្នុងការប្រកួតប្រជែងជុំទី២ នាថ្ងៃទី៨ ខែធ្នូ។ លោក Georgescu ទទួលបានការបោះឆ្នោតភាគច្រើនពីអ្នកបោះឆ្នោតវ័យក្មេង និងជនជាតិរ៉ូម៉ានីដែលរស់នៅក្រៅប្រទេស ហើយយុទ្ធនាការរបស់លោក ត្រូវបានជំរុញយ៉ាងខ្លាំងក្លាដោយបណ្ដាញសង្គម TikTok។

លោក Georgescu ធ្លាប់បានសរសើរអ្នកនយោបាយហ្វាស៊ីសរ៉ូម៉ានី ក្នុងទសវត្សរ៍ឆ្នាំ១៩៣០ ថា ជាវីរបុរសជាតិ និងទុក្ករបុគ្គល (បុគ្គលហ៊ានបូជាជីវិតសម្រាប់បុព្វហេតុសាសនា ឬនយោបាយ) បានរិះគន់ដល់ជំហរគាំទ្រអ៊ុយក្រែនរបស់អង្គការណាតូ និងរ៉ូម៉ានី ហើយបាននិយាយថា ប្រទេសនេះគួរតែចូលរួម មិនមែនប្រជែងជាមួយរុស្ស៊ីនោះទេ។

ប៉ុន្តែក្នុងការផ្សាយតាមបណ្តាញសង្គម Facebook កាលពីល្ងាចថ្ងៃអង្គារ (ទី២៦ ខែវិច្ឆិកា) លោកបាននិយាយថា៖ «ខ្ញុំមិនចង់ចាកចេញពីអង្គការណាតូទេ ខ្ញុំមិនចង់ចាកចេញពីសហភាពអឺរ៉ុបទេ។ តែអ្វីដែលខ្ញុំចង់បាន គឺប្រកាន់ជំហរយ៉ាងរឹងមាំ មិនមែនចុះញ៉ម នៅទីនោះទេ ពោលគឺកុំទទួលយកអ្វីគ្រប់យ៉ាង។ ដូចខ្ញុំបាននិយាយ យើងគួរធ្វើគ្រប់យ៉ាង ដើម្បីផលប្រយោជន៍ជាតិ»៕