ច្រកព្រំដែនភាគខាងជើងលីបង់ជាមួយស៊ីរី នៅភូមិ Arida និងភូមិ Dabousieh បានរងការខូចខាតយ៉ាងធ្ងន់ធ្ងរនៅថ្ងៃពុធនេះ បន្ទាប់ពីការវាយប្រហាររបស់អ៊ីស្រាអែលកាលពីយប់ថ្ងៃអង្គារ ។

រដ្ឋមន្រ្តីក្រសួងដឹកជញ្ជូនលីបង់លោក Ali Hamieh និយាយប្រាប់ទីភ្នាក់ងារព័ត៌មានរ៉យទ័រថា ការវាយប្រហារនេះ មានគោលដៅលើច្រកព្រំដែន ៣កន្លែងជាលើកដំបូង នៅតំបន់ព្រំដែនភាគខាងជើងលីបង់ជាមួយស៊ីរី ។

ការវាយប្រហារនេះ បានកើតមានឡើង ក្រោយពេលប្រធានាធិបតីសហរដ្ឋអាមេរិកលោក Joe Biden បានប្រកាសថា បទឈប់បាញនឹងចូលជាធរមាននៅវេលាម៉ោង ៤ព្រឹកទាបភ្លឺថ្ងៃពុធម៉ោងក្នុងស្រុក ដើម្បីបញ្ឈប់ជម្លោះរវាងក្រុមប្រដាប់អាវុធហេសបូឡារបស់លីបង់ និងកងទ័ពអ៊ីស្រាអែល ។

ការវាយឆ្មក់លើច្រកឆ្លងកាត់ព្រំដែននៅភាគខាងកើតលីបង់ក្នុងរយៈពេលប៉ុន្មានសប្តាហ៍កន្លងមកនេះ បានបិទផ្លូវទាំងអស់នោះចូលទៅកាន់ប្រទេសស៊ីរី ។

ទីភ្នាក់ងារព័ត៌មានរដ្ឋស៊ីរី រាយការណ៍ថា ជនស៊ីវិល ៤នាក់ និងទាហាន ២នាក់ ត្រូវបានសម្លាប់ និងមនុស្ស ១២នាក់ផ្សេងទៀត បានរងរបួស រួមទាំងក្មេងៗ ស្រ្តី និងកម្មករនៅក្នុងក្រុមអឌ្ឍចន្ទក្រហមស៊ីរី ។

យោធាអ៊ីស្រាអែល ពុំបានធ្វើសេចក្តីអត្ថាធិប្បាយភ្លាមៗនោះទេចំពោះការវាយប្រហារទាំងនេះ ។ កាលពីមុនពួកគេធ្លាប់បានបញ្ជាក់ថា គោលដៅវាយប្រហារ គឺជាទីតាំងដែលមានទំនាក់ទំនងជាមួយអ៊ីរ៉ង់ នៅស៊ីរី ដែលជាផ្នែកមួយនៃការយុទ្ធនាការទប់ស្កាត់ឥទ្ធិពលរបស់អ៊ីរ៉ង់ និងសម្ព័ន្ធមិត្តហេសបូឡានៅក្នុងតំបន់ ៕