នាយករដ្ឋមន្ត្រីស្លូវ៉ាគី លោក Robert Fico នៅថ្ងៃពុធ (ទី២៧ ខែវិច្ឆិកា) នេះ បាននិយាយថា លោកនឹងចូលរួមពិធីរំលឹកសង្រ្គាមលោកលើកទី២ នៅទីក្រុងមូស្គូ ក្នុងខែឧសភា ខណៈដែលលោកបានទទួលយកការអញ្ជើញពីប្រធានាធិបតីរុស្ស៊ី លោក Vladimir Putin។

លោក Fico ដែលរដ្ឋាភិបាលរបស់លោក បានស្វែងរកការធ្វើឲ្យប្រសើរឡើងនូវទំនាក់ទំនងជាមួយរុស្ស៊ី ទោះបីជាមានការលុកលុយលើអ៊ុយក្រែនក៏ដោយ បាននិយាយកាលពីមុន អំពីការចង់ចូលរួម ក្នុងព្រឹត្តិការណ៍ នៅទីក្រុងមូស្គូ នាឆ្នាំក្រោយ។ នៅថ្ងៃពុធនេះ លោកបានប្រាប់ថា លោកបានទទួលយកការអញ្ជើញជាផ្លូវការហើយ។

តាមរយៈការបង្ហោះ នៅលើបណ្ដាញសង្គម Facebook លោក Fico បានប្រាប់ថា៖ «វាជារឿងធម្មតា ដែលក្នុងនាមជានាយករដ្ឋមន្ត្រីនៃសាធារណរដ្ឋស្លូវ៉ាគី ខ្ញុំមានចំណាប់អារម្មណ៍យ៉ាងខ្លាំង ក្នុងការចូលរួមក្នុងការប្រារព្ធពិធីផ្លូវការនៃជ័យជម្នះលើហ្វាស៊ីសនិយម ដែលនឹងប្រព្រឹត្តទៅនាថ្ងៃទី៩ ខែឧសភា ឆ្នាំ២០២៥ នៅទីក្រុងមូស្គូ។ ដូច្នេះ ខ្ញុំពិតជារីករាយក្នុងការទទួលយកការអញ្ជើញជាផ្លូវការរបស់ប្រធានាធិបតីសហព័ន្ធរុស្ស៊ី លោក Putin ដើម្បីចូលរួមក្នុងការប្រារព្ធពិធីដ៏សំខាន់ទាំងនេះ ដែលខ្ញុំនឹងទៅ»។

ដោយឡែក ការិយាល័យរដ្ឋាភិបាលស្លូវ៉ាគី បានឲ្យដឹងនៅថ្ងៃពុធនេះថា លោក Fico បានជជែកតាមទូរសព្ទជាមួយប្រធានាធិបតីជាប់ឆ្នោតរបស់សហរដ្ឋអាមេរិក លោក Donald Trump ហើយថា ការពិភាក្សាតាមទូរសព្ទនេះ ភាគច្រើនបានផ្តោតលើសង្គ្រាម នៅអ៊ុយក្រែនដែលមានព្រំដែនជាមួយស្លូវ៉ាគី។

បន្ទាប់ពីឡើងកាន់តំណែងជាងមួយឆ្នាំមុន រដ្ឋាភិបាលជាតិនិយមឆ្វេងនិយមរបស់ លោក Fico បានបញ្ឈប់ភ្លាមៗនូវការផ្គត់ផ្គង់យោធាដល់ទីក្រុងគីវ ខណៈដែលអនុញ្ញាតឲ្យបន្តការលក់បែបពាណិជ្ជកម្ម ហើយខ្លួនបានលើកហេតុផលថា ការបញ្ចូនអាវុធទៅ កំពុងធ្វើឲ្យសង្រ្គាមអូសបន្លាយ នៅទីនោះ៕