នគរបាលប៉ាគីស្ថានបាននិយាយកាលពីថ្ងៃពុធ ទី២៧ ខែវិច្ឆិកាសប្ដាហ៍នេះ ថា ពួកគេបានចាប់ខ្លួន     បាតុករជិត ១.០០០នាក់ ដែលបានដើរដង្ហែរក្បួននៅរដ្ឋធានីទាមទារឱ្យដោះលែងអតីតនាយករដ្ឋមន្ត្រី លោក Imran Khan ដែលកំពុងជាប់ពន្ធនាគារ បន្ទាប់ពីហ្វូងមនុស្សត្រូវបានបណ្តេញចេញពីកណ្តាលរដ្ឋធានីក្នុងការបង្ក្រាបពីកងកម្លាំងសន្តិសុខដ៏ហិង្សា បណ្ដាលឲ្យមនុស្ស៨នាក់ស្លាប់។  

លោក Khan ត្រូវបានជាប់ពន្ធនាគារតាំងពីខែសីហា ឆ្នាំ ២០២៣ មកពាក់ព័ន្ធបន្ទុកផ្លូវច្បាប់រាប់សិបករណីដែលលោកអះអាងថាជាសកម្មភាពទប់ស្កាត់ការវិលត្រឡប់វត្តមានរបស់លោកក្នុងការបោះឆ្នោតនៅឆ្នាំនេះ ដោយសារការចោទប្រកាន់មិនពិត។   

ចាប់តាំងពីការបោះឆ្នោតខែកុម្ភៈមក គណបក្សPTI របស់អតីតនាយករដ្ឋមន្ត្រីរូបនេះ បានប្រឆាំងការបង្រ្កាបរបស់រដ្ឋាភិបាលតាមរយៈការប្រមូលផ្តុំគ្នាជាទៀងទាត់ ប៉ុន្តែការប្រមូលផ្តុំកាលពីថ្ងៃអង្គារសប្ដាហ៍នេះ មានទំហំធំជាងការប្រមូលផ្ដុំកាលពីកន្លងទៅ ដើម្បីដណ្តើមគ្រប់គ្រងរដ្ឋធានី ចាប់តាំងពីការបោះឆ្នោត។

បាតុករជាង១០.០០០នាក់បានសម្រុលចូលទៅក្នុងទីក្រុង ប្រឆាំងការបិទខ្ទប់ និងហាមប្រាមការជួបជុំជាសាធារណៈ ហើយបានប៉ះទង្គិចជាមួយកងកម្លាំងសន្តិសុខចំនួន២០.០០០នាក់ ខណៈព្យាយាមរុញច្រានក្រុមបាតុករទាំងនោះចាកចេញពីរដ្ឋធានី ។

ស្នងការនគរបាលក្រុង Islamabad លោក Ali Nasir Rizvi បាននិយាយថា បាតុករចំនួន ៩៥៤នាក់ ត្រូវបានចាប់ខ្លួននៅចន្លោះថ្ងៃអាទិត្យ និងថ្ងៃអង្គារ នៅពេលហ្វូងមនុស្សសម្រុកចូលចម្ងាយមួយម៉ាយពីទីលានសាធារណៈដែលពួកគេមានបំណងកាន់កាប់។គិតមកដល់ពេលនេះ ប៉ាគីស្ថាន បានបញ្ចប់ការបិទខ្ទប់រដ្ឋធានីហើយ ក្រោយការសម្អាតក្រុមបាតុករ៕