កងទ័ពលីបង់កាលពីថ្ងៃពុធ បានចាប់ផ្តើមពង្រឹងការដាក់ពង្រាយរបស់ខ្លួន នៅក្នុងតំបន់ Litani ភាគខាងត្បូងរបស់ប្រទេសនេះ និងពង្រីកអាជ្ញាធររដ្ឋ នៅទីនោះ ដោយមានការសម្របសម្រួលជាមួយកងកម្លាំងបណ្តោះអាសន្នអង្គការសហប្រជាជាតិ នៅក្នុងប្រទេសលីបង់ (UNIFIL)។

សេចក្តីថ្លែងការណ៍ដែលចេញផ្សាយដោយកងទ័ពលីបង់ បានឲ្យដឹងថា ជំហាននេះ កើតឡើងក្នុងក្របខ័ណ្ឌនៃការប្តេជ្ញាចិត្តរបស់រដ្ឋាភិបាលលីបង់ ក្នុងការអនុវត្តសេចក្តីសម្រេចលេខ ១៧០១ របស់ក្រុមប្រឹក្សាសន្តិសុខUN ជាពិសេសទាក់ទងនឹងការពង្រឹងការដាក់ពង្រាយកងទ័ព និងកងកម្លាំងសន្តិសុខទាំងអស់ នៅក្នុងតំបន់ Litani។

សេចក្តីថ្លែងការណ៍នេះ បានបន្តថា៖«នៅក្នុងបរិបទនេះ អង្គភាពយោធាដែលពាក់ព័ន្ធកំពុងធ្វើការផ្លាស់ប្តូរ ពីតំបន់ជាច្រើន ទៅកាន់តំបន់ Litani ភាគខាងត្បូង ជាទីដែលពួកគេនឹងឈរជើង នៅក្នុងទីតាំងដែលបានកំណត់»។

គណៈរដ្ឋមន្ត្រីសន្តិសុខរបស់អ៊ីស្រាអែលកាលពីយប់ថ្ងៃអង្គារ បានអនុម័តកិច្ចព្រមព្រៀងឈប់បាញ់ជាមួយលីបង់ ដោយបើកផ្លូវឲ្យបញ្ចប់ជម្លោះជិត ១៤ខែ ហើយនោះ។

យោងតាមកិច្ចព្រមព្រៀងបទឈប់បាញ់ កងទ័ពលីបង់នឹងកាន់កាប់ទឹកដីរបស់ខ្លួន ក្នុងរយៈពេល ៦០ថ្ងៃខាងមុខ ស្របពេលដែលមានការធានាថា ក្រុមហេសបូឡា នឹងមិនប្រមូលផ្តុំនៅទីនោះឡើងវិញទេ។ អ៊ីស្រាអែល នឹងដកកងទ័ពចេញជាបណ្តើរៗ ហើយជនស៊ីវិល នឹងត្រឡប់ទៅផ្ទះសម្បែងរបស់ពួកគេវិញ។