បណ្តាមេដឹកនាំប្រទេសនៅអឺរ៉ុប បានប្រកាសពីផែនការរបស់ពួកគេ ក្នុងការបង្កើនការគាំទ្រសម្រាប់អ៊ុយក្រែន មុនពេលប្រធានាធិបតីជាប់ឆ្នោតរបស់សហរដ្ឋអាមេរិក លោក Donald Trump ឡើងកាន់តំណែងនៅទីក្រុងវ៉ាស៊ីនតោន។

កិច្ចប្រជុំកំពូលអឺរ៉ុបខាងជើងនិងតំបន់សមុទ្របាល់ទិក(Nordic-Baltic) រយៈពេលពីរថ្ងៃ បានចាប់ផ្តើមនៅប្រទេសស៊ុយអែត កាលពីថ្ងៃពុធ។ ប្រមុខរដ្ឋាភិបាល មកពីប្រទេសជាប់ព្រំដែនរុស្ស៊ី រួមមាន ប្រទេសហ្វាំងឡង់ ឡាតវី និងអេស្តូនី បានចូលរួមកិច្ចប្រជុំនេះ។ ពួកគេបាននិយាយនៅក្នុងសេចក្តីថ្លែងការណ៍រួមថា «ចំណងមិត្តភាពឆ្លងមហាសាគរអាត្លង់ទិក ពុំអាចកាត់ផ្តាច់បាន» ហើយប្រទេសទាំងនេះនឹងផ្គត់ផ្គង់គ្រាប់រំសេវបន្ថែមទៀតដល់ប្រទេសអ៊ុយក្រែន។

នាយករដ្ឋមន្ត្រីស៊ុយអែត លោក Ulf Kristersson បាននិយាយថា «មុនពេលយើងស្ថិតនៅផ្លូវបំបែកជាប្រវត្តិសាស្ត្រ» វាអាស្រ័យលើយើង ក្នុងការជ្រើសរើសផ្លូវណា ដែលយើងដើរសម្រាប់ប្រជាជាតិរបស់យើង និងសម្រាប់ទ្វីបអឺរ៉ុប។

ក្តីបារម្ភជាច្រើន ជុំវិញសន្តិសុខជាតិ បាននិងកំពុងកើនឡើងនៅក្នុងប្រទេសស៊ុយអែត។

ប្រជាជននៅក្នុងរដ្ឋធានី Stockholm បាននិងកំពុងត្រៀមសម្រាប់ផលប៉ះពាល់នានា។ ជាឧទាហរណ៍ លោក Martin Svennberg បានចាប់ផ្តើមស្តុកអាហារទុកនៅក្នុងទីជម្រកសម្រាប់គ្រាអាសន្ន។

លោក Svennberg បាននិយាយថា «ស្ថានភាពនៃរឿង ដែលកំពុងកើតឡើងនៅពេលនេះ ជាមួយរុស្ស៊ី ខិតកាន់កៀក ហើយយើងគឺជាផ្នែកមួយនៃសម្ព័ន្ធយោធា NATO ដូច្នេះវាពិតជាពាក់ព័ន្ធ នៅពេលនេះ។