ក្រុមឧទ្ទាម Hayat Tahrir al-Sham (HTS) និងក្រុមសម្ព័ន្ធមិត្ត បានបើកការវាយលុកដ៏ធំមួយ លើទីតាំងយោធាស៊ីរី នៅតំបន់ជនបទភាគខាងលិចនៃខេត្តអាឡិបប៉ូ ( Aleppo) កាលពីថ្ងៃពុធ ដោយបណ្តាលឲ្យមានការដណ្តើមកាន់ទឹកដីមួយចំនួន និង មនុស្ស៨៩នាក់ស្លាប់។ នេះបើយោងតាមក្រុមឃ្លាំមើលសង្គ្រាម។

ក្រុមឃ្លាំមើលសិទ្ធិមនុស្សស៊ីរី បានរាយការណ៍ថា ក្រុមឧទ្ទាម HTS និងបក្ខពួកមកពីបន្ទប់ប្រតិបត្តិការ al-Fatah al-Mubin ដណ្តើមបានគ្រប់គ្រងភូមិចំនួន ២១ ទីប្រជុំជន និងទីតាំងយុទ្ធសាស្ត្រ ក្នុងរយៈពេលមិនដល់ ១២ម៉ោង ចាប់តាំងពីការចាប់ផ្តើមនៃប្រតិបត្តិការដោយដាក់ឈ្មោះថា «ការទប់ស្កាត់ការឈ្លានពាន»។

ក្រុមឃ្លាំមើលនេះ បានកត់សម្គាល់ថា យុទ្ធជន៨៩នាក់ បានស្លាប់នៅក្នុងការប៉ះទង្គិចគ្នា កាលពីថ្ងៃពុធក្នុងនោះមានយុទ្ធជន ៥៣នាក់ មកពី ក្រុមឧទ្ទាម HTS និងក្រុមគាំទ្ររបស់ខ្លួន និងទាហាន ៣៧នាក់ មកពីកងកម្លាំងរដ្ឋាភិបាលស៊ីរី។

បន្ថែមពីលើនេះ ទាហានស៊ីរី ៥នាក់ ត្រូវបានចាប់ខ្លួនដោយ ក្រុមHTS ដែលបានរឹបអូសឃ្លាំងអាវុធ រថពាសដែក និងអាវុធធុនធ្ងន់ផងដែរ។

ក្រុមឃ្លាំមើលសិទ្ធិមនុស្ស បានរាយការណ៍ថា ជាការឆ្លើយតបទៅនឹងការវាយលុកនេះ យន្តហោះចម្បាំង រុស្ស៊ីបានធ្វើការវាយប្រហារតាមអាកាសដោយប្រើមីស៊ីល ទៅលើទីតាំងផ្នែកខាងក្រោយរបស់ក្រុមសកម្មប្រយុទ្ធ នៅជុំវិញទីក្រុង Atarib ហើយកងកម្លាំងរដ្ឋាភិបាលស៊ីរីបានបាញ់ផ្លោង ទៅលើទីក្រុង Atarib, Darat Izza និងភូមិជុំវិញដោយកាំភ្លើងធំរាប់រយគ្រាប់ និងគ្រាប់រ៉ូកែត ដោយបន្ថែមថា យន្តហោះចម្បាំងស៊ីរី និងរុស្ស៊ី បានធ្វើការវាយប្រហារតាមអាកាសចំនួន ២៦លើក អំឡុងពេលមានការប៉ះទង្គិចគ្នានោះ។