នគរបាលអង់គ្លេស បាននិយាយថា ពួកគេបានចាប់ខ្លួនមនុស្ស ៧នាក់ និងកំពុងឆែកឆេរមជ្ឈមណ្ឌលសហគមន៍ជនជាតិឃើដ នៅក្នុងទីក្រុងឡុងដ៍ ដែលជាផ្នែកមួយនៃការស៊ើបអង្កេតប្រឆាំងភេរវកម្ម ទៅលើសកម្មភាពដែលសង្ស័យពាក់ព័ន្ធនឹងគណបក្សពលករឃើដដែលត្រូវបានគេហាមឃាត់ ដោយត្រូវបានគេស្គាល់ថា PKK។

នគរបាល បាននិយាយថា អ្នកដែលត្រូវបានចាប់ខ្លួនមានបុរស ៥នាក់ និងស្ត្រី ២នាក់ ដែលមានអាយុចន្លោះពី ២៣ ទៅ ៦២ឆ្នាំ ដោយបន្ថែមថា មិនមានការគំរាមកំហែងដល់សាធារណជនឡើយ។

ស្នងការនគរបាលស្តីទី លោកស្រី Helen Flanagan បាននិយាយថា៖«សកម្មភាពនេះ បានកើតឡើង បន្ទាប់ពីការស៊ើបអង្កេតនិងប្រតិបត្តិការដ៏សំខាន់មួយទៅលើសកម្មភាពដែលយើងជឿថា មានទំនាក់ទំនងជាមួយ ក្រុមភេរវករ PKK»។

«ទាំងនេះ គឺជាគោលដៅចាប់ខ្លួនអ្នកដែលយើងសង្ស័យថា មានការជាប់ពាក់ព័ន្ធ ក្នុងសកម្មភាពភេរវកម្មដែលមានទំនាក់ទំនងជាមួយក្រុមនេះ»។

ក្រុម PKK ជាក្រុមសកម្មប្រយុទ្ធមួយដែលបានបង្កើតឡើង នៅភាគអាគ្នេយ៍ប្រទេសទួរគី ក្នុងឆ្នាំ ១៩៧៨ ក្នុងគោលបំណងបង្កើតរដ្ឋឃើដដឯករាជ្យមួយដែលត្រូវបានហាមឃាត់ នៅក្នុងប្រទេសអង់គ្លេស ក្នុងឆ្នាំ ២០០១។ ក្រុមនេះ បានចូលរួមក្នុងជម្លោះរយៈពេល ៤០ឆ្នាំ ដែលបានបណ្តាលឲ្យមនុស្សជាង ៤០.000នាក់ ស្លាប់។