អស់រយៈពេលជាងមួយសប្តាហ៍ហើយ នាវាពាណិជ្ជកម្មរបស់ចិន ទំនងជាត្រូវបានបង្ខំឲ្យបោះយុថ្កាចត នៅសមុទ្របាល់ទិក ដែលត្រូវបានឡោមព័ទ្ធ និងត្រួតពិនិត្យដោយនាវាកងទ័ពជើងទឹក និងឆ្មាំល្បាតឆ្នេរមកពីបណ្តាប្រទេសអឺរ៉ុប ខណៈដែលអាជ្ញាធរប្រឹងប្រែងស្រាយអាថ៌កំបាំងដែនសមុទ្រ។

ហេតុការណ៍នេះបានកើតឡើងបន្ទាប់ពីខ្សែកាបអុបទិកបង្កប់ក្រោមបាតសមុទ្រចំនួន ២ខ្សែ ត្រូវបានកាត់ផ្តាច់ ហើយអ្នកស៊ើបអង្កេតមកពីក្រុមកងកម្លាំងពិសេស ដែលរួមមានហ្វាំងឡង់ ស៊ុយអែត និងលីទុយអានី កំពុងព្យាយាមកំណត់ថា តើនាវិករបស់នាវានេះ មានចេតនាធ្វើឲ្យដាច់ខ្សែកាប ដោយអូសយុថ្ការបស់នាវាកាត់តាមបាតសមុទ្រដែរ ឬយ៉ាងណា។

កាលថ្ងៃពុធ (ទី២៧ ខែវិច្ឆិកា) នគរបាលស៊ុយអែត បានប្រកាសថា ការសាកសួរ ចំពោះករណីនេះ បានឈានដល់សេចក្ដីសន្និដ្ឋានហើយ ប៉ុន្តែការស៊ើបអង្កេតកំពុងបន្តប្រព្រឹត្តទៅ។ ស៊ុយអែតមិនបានចេញផ្សាយការរកឃើញដំបូងណាមួយឡើយ។ មន្ត្រីចារកម្មអាមេរិកបានវាយតម្លៃថា ខ្សែកាបនេះមិនត្រូវបានផ្ដាច់ដោយចេតនានោះទេ ទោះបីជាអាជ្ញាធរនៅអឺរ៉ុប និយាយថា ពួកគេមិនអាចច្រានចោលអំពើវិឆ្ឆេទកម្មបានឡើយ។ ចំណែកប្រទេសដាណឺម៉ាក បានឲ្យដឹងថា ខ្លួនកំពុងបន្ត «ការសន្ទនា» ជាមួយប្រទេសនានា ក្នុងនោះរួមទាំងចិនផងដែរ។

គួរបញ្ជាក់ថា ករណីជុំវិញនាវាពាណិជ្ជកម្ម នៅសមុទ្របាល់ទិក គឺមានលក្ខណៈខុសគ្នាខ្លះ។ នាវានោះដែលជានាវាដឹកទំនិញដ៏ធំឈ្មោះ Yi Peng 3 ធ្វើដំណើរក្រោមទង់ជាតិរបស់ប្រទេសចិន។ បើយោងតាម Marine Traffic ដែលជាទីភ្នាក់ងារតាមដាននាវាពាណិជ្ជកម្ម បានឲ្យដឹងថា នាវាដែលជាកម្មសិទ្ធិរបស់ក្រុមហ៊ុន Ningbo Yipeng Shipping Co. Ltd. បានចេញដំណើរពីកំពង់ផែរុស្ស៊ី Ust-Luga ក្នុងសមុទ្របាល់ទិក កាលពីថ្ងៃទី១៥ ខែវិច្ឆិកា៕