ខណៈដែលអាកាសធាតុត្រជាក់ភ្លាមៗ បានគ្របដណ្តប់ប្រទេស អាជ្ញាធរចិន បានផ្តួចផ្តើមឲ្យមានវិធានការឆ្លើយតបគ្រាអាសន្ន ដើម្បីកាត់បន្ថយផលប៉ះពាល់ពីសីតុណ្ហភាពចុះត្រជាក់ និងការធ្លាក់ព្រិលខ្លាំង។

គួររំលឹកថា ចាប់តាំងពីថ្ងៃទី២៣ ខែវិច្ឆិកាមក ខ្យល់បក់ខ្លាំង និងព្រិលធ្លាក់ខ្លាំង បានប៉ះពាល់ដល់តំបន់ស្វយ័តម៉ុងហ្គោលីខាងក្នុង (Inner Mongolia) ភាគឦសាន និងភាគខាងជើងប្រទេសចិន ដោយសីតុណ្ហភាពធ្លាក់ចុះពី ១២អង្សាសេទៅ ១៦អង្សារសេ នៅតំបន់ខ្លះ។

រដ្ឋបាលឧតុនិយមចិន បានប្រកាសវិធានការឆ្លើយតបគ្រាអាសន្នកម្រិតទី៤ កាលពីថ្ងៃទី២៥ ខែវិច្ឆិកា ដើម្បីដោះស្រាយព្យុះព្រិលដែលកំពុងបន្តមាន ដោយណែនាំឲ្យតំបន់ដែលរងផលប៉ះពាល់កែតម្រូវវិធានការ ដោយផ្អែកលើស្ថានភាពក្នុងតំបន់។

នៅខេត្ត Heilongjiang ការធ្លាក់ព្រិលបានជំរុញឲ្យការិយាល័យឧតុនិយម ក្នុងតំបន់ ចេញការប្រកាសអាសន្នពណ៌ក្រហម ដែលជាកម្រិតខ្ពស់បំផុតនៅក្នុងប្រព័ន្ធព្រមាន ៤ថ្នាក់របស់ប្រទេសចិន ហើយផ្តួចផ្តើមឲ្យមានផែនការសង្គ្រោះបន្ទាន់ ដើម្បីកាត់បន្ថយផលប៉ះពាល់នៃការធ្លាក់ព្រិលនេះ។ ក្នុងខេត្ត Jilin បុគ្គលិកអនាម័យ បាន និងកំពុងបោសសម្អាតព្រិលទឹកកកចេញពីផ្លូវថ្នល់ ដោយដាក់ពង្រាយឧបករណ៍រុញព្រិលធំៗ ដើម្បីធានាសុវត្ថិភាពដល់ការធ្វើដំណើរ។

ចំណែកនាយកដ្ឋានដឹកជញ្ជូន បានឆ្លើយតបយ៉ាងរហ័ស ចំពោះគ្រោះអាសន្នផ្លូវថ្នល់ ដោយជួយដល់យានជំនិះដែលជាប់ក្នុងព្រិល និងស្ដារស្ថានភាពចរាចរណ៍ឡើងវិញ ដោយប្រើរថយន្តសម្អាតព្រិល និងរថយន្តនគរបាល។

គួរបញ្ជាក់ថា រលកត្រជាក់នេះ ត្រូវបានគេរំពឹងថា នឹងបន្តផ្លាស់ទីទៅភាគអាគ្នេយ៍ ដែលប៉ះពាល់ដល់តំបន់កណ្តាល និងភាគខាងកើតនៃប្រទេសចិន ក្នុងរយៈពេលប៉ុន្មានថ្ងៃខាងមុខនេះ។ អ្នកព្យាករណ៍ បានព្យាករថា សីតុណ្ហភាព ក្នុងតំបន់ជាច្រើន នឹងធ្លាក់ចុះពី ៦អង្សាសេ ទៅ ៨ អង្សាសេ៕