រដ្ឋបាលលោក Joe Biden កាលពីថ្ងៃពុធ (ទី២៧ ខែវិច្ឆិកា) បានឲ្យដឹងថា ជនជាតិអាមេរិក ៣នាក់ ដែលត្រូវបានឃុំខ្លួននៅប្រទេសចិន ត្រូវបានដោះលែងហើយ តាមរយៈលក្ខខណ្ឌដោះដូរអ្នកទោសជាមួយទីក្រុងប៉េកាំង។ ហើយបើយោងតាមមន្ត្រីជាន់ខ្ពស់អាមេរិក បានប្រាប់ថា ម្នាក់ក្នុងចំណោមបុរសទាំងនោះ គឺជាអ្នកផ្តល់ព័ត៌មានឲ្យ FBI (ទីភ្នាក់ងារស៊ើបអង្កេតសហព័ន្ធ)។

លោក John Leung លោក Kai Li និងលោក Mark Swidan បានធ្វើដំណើរទៅកាន់សហរដ្ឋអាមេរិក កាលពីថ្ងៃទី២៧ ខែវិច្ឆិកា បន្ទាប់ពីមាននូវយុទ្ធសាស្ត្រការទូតអស់រយៈពេលជាច្រើនខែ ដើម្បីឲ្យពួកគេមានសេរីភាព។ លោក Leung និងលោក Li ត្រូវបានឃុំខ្លួនអស់រយៈពេល ៣ឆ្នាំ និង ៨ឆ្នាំ។ ចំណែកលោក Swidan ត្រូវបានឃុំខ្លួនអស់រយៈពេលជាង ១ទសវត្សរ៍។

លោក Sean Savett អ្នកនាំពាក្យក្រុមប្រឹក្សាសន្តិសុខជាតិ បាននិយាយថា៖ «ឆាប់ៗនេះ ពួកគេនឹងត្រលប់មកវិញ ហើយត្រូវបានជួបជុំជាមួយក្រុមគ្រួសាររបស់ពួកគេឡើងវិញជាលើកដំបូង ក្រោយបែកគ្នាជាច្រើនឆ្នាំ»។ លោកបានបន្ថែមថា គ្មានជនជាតិអាមេរិកផ្សេងទៀតត្រូវបាន «ឃុំខ្លួនដោយមិនត្រឹមត្រូវ» នៅក្នុងប្រទេសចិនទេ។

ហើយបើយោងតាមមន្ត្រីអាមេរិក ២រូប បានឲ្យដឹងថា ជាថ្នូរវិញ សហរដ្ឋអាមេរិកបានដោះលែងលោក Xu Yanjun ជាមន្ត្រីចារកម្មចិនដែលជាប់ពន្ធនាគាររយៈពេល ២០ឆ្នាំ បន្ទាប់ពីរូបលោកត្រូវបានចាប់ខ្លួននៅទីក្រុងប្រ៊ុចសែល ប្រទេសបែលហ្ស៊ិក ក្នុងឆ្នាំ២០១៨ និងបានធ្វើបត្យាប័នទៅសហរដ្ឋអាមេរិក ដោយសារមានប្រតិបត្តិការយ៉ាងខ្លាំងក្លាពី FBI៕