ខ្មាន់កាំភ្លើង បានចាប់ចំណាប់ខ្មាំង ៦នាក់ក្នុងខែនេះ ខណៈដែលមានការបាញ់ប្រហារគ្នាជាមួយកងទ័ព នៅក្នុងរដ្ឋ Manipur ភាគឦសាននៃប្រទេសឥណ្ឌា បន្ទាប់ពីការបាញ់ប្រហារដោយប្រើអាវុធប្រភេទបេ៤០ បានធ្វើឲ្យរថយន្តជាច្រើនគ្រឿង និងផ្ទះសម្បែងជាច្រើនខ្នងឆេះខ្ទេច នៅតំបន់ភ្នំ Jiribam។

គួរបញ្ជាក់ថា ការប៉ះទង្គិចគ្នា ជុំវិញបញ្ហាដី និងកូតា ក្នុងវិស័យអប់រំ ព្រមទាំងការងាររដ្ឋាភិបាល បានសម្លាប់មនុស្សយ៉ាងហោចណាស់ ២៥៨នាក់ និងបានធ្វើឲ្យមនុស្សជាង ៦០.០០០នាក់ ជម្លៀសចេញពីផ្ទះសម្បែង ចាប់តាំងពីឆ្នាំមុន ដែលជាការបរាជ័យដ៏ធំបំផុត ក្នុងការអនុវត្តច្បាប់ និងរៀបចំសណ្តាប់ធ្នាប់ សម្រាប់គណបក្សរបស់នាយករដ្ឋមន្ត្រី Narendra Modi ដែលគ្រប់គ្រងរដ្ឋនេះ។

ការបាញ់សងសឹកដោយកងទ័ព បានសម្លាប់ខ្មាន់កាំភ្លើងយ៉ាងហោចណាស់ ១០នាក់ នៅក្នុងការវាយប្រហារកាលពីថ្ងៃទី១១ ខែវិច្ឆិកា ដែលអាជ្ញាធរបានស្តីបន្ទោសទៅលើក្រុម Hmar ក្នុងចំណោមជនជាតិភាគតិច Kuki ដោយនេះជាការឆ្លើយតបទៅនឹងការដុតភូមិកាលពីមុន និងការសម្លាប់មនុស្ស។

ក្រុមមន្ត្រីបានសន្មតថា ការដុត និងសម្លាប់នេះ ជាអំពើរបស់សមាជិកនៃក្រុមជនជាតិភាគតិច Meitei ដែលជាជនជាតិភាគតិចភាគច្រើនរបស់រដ្ឋ។ ក្រសួងមហាផ្ទៃឥណ្ឌា ដែលបានបញ្ជូនទាហានបន្ថែមទៅរដ្ឋ Manipur បន្ទាប់ពីមានអំពើហិង្សានោះ មិនបានឆ្លើយតបនឹងសំណើសុំការអត្ថាធិប្បាយទេ។

គួររំលឹកថា ជនជាតិភាគតិច Kuki និង Meitei បានប្រយុទ្ធគ្នានៅតំបន់ជើងភ្នំរបស់រដ្ឋ Manipur ចាប់តាំងពីខែឧសភា ឆ្នាំ២០២៣ ជុំវិញការរំពឹងទុកពីការដកផលប្រយោជន៍សុខុមាលភាពពីជនជាតិ Kuki ដែលកាន់សាសនាគ្រិស្តភាគច្រើន ពោលគឺក្រុមមនុស្សដែលឥណ្ឌាចាត់ថា មិនសូវមានសមត្ថភាពប្រកួតប្រជែង ដោយយកផលប្រយោជន៍នោះបន្ថែមឲ្យជនជាតិ Meitei ដែលភាគច្រើនកាន់សាសនាហិណ្ឌូ៕