មនុស្សម្នានាំគ្នារត់រកទីជម្រកនៅក្នុងស្ថានីយ៍រថភ្លើងក្រោមដីនៅទីក្រុងគីវ ពេលដែលរុស្ស៊ីបើកការវាយប្រហារទ្រង់ទ្រាយធំដោយមីស៊ីលើប្រទេសអ៊ុយក្រែននាថ្ងៃព្រហស្បតិ៍នេះ ។

នៅថ្ងៃព្រហស្បតិ៍នេះ រុស្ស៊ី បានបើកការវាយប្រហារទ្រង់ទ្រាយធំជាលើកទី ២ លើហេដ្ឋារចនាសម្ព័ន្ធថាមពលអ៊ុយក្រែននាខែនេះ ក្នុងនោះក្រុមមន្រ្តីក្នុងស្រុក និងក្រុមមន្រ្តីថ្នាក់ជាតិ បានរាយការណ៍ពីការផ្ទុះគ្រាប់ និងការកាត់ផ្តាច់ចរន្តអគ្គិសនីនៅទូទាំងប្រទេស ធ្វើឲ្យប៉ះពាល់ដលមនុស្សរាប់ម៉ឺននាក់ ។

រដ្ឋមន្រ្តីក្រសួងថាមពលអ៊ុយក្រែនលោក German Galushchenko និយាយនៅលើបណ្តាញព័ត៌មានសង្គម Facebook ថា ជាថ្មីម្តងទៀត ហេដ្ឋារចនាសម្ព័ន្ធថាមពលបានក្លាយជាគោលដៅវាយប្រហាររទ្រង់ទ្រាយធំរបស់សត្រូវ ។

លោក Galushchenko និយាយថា ប្រតិបត្តិករបណ្តាញអគ្គិសនីជាតិអ៊ុយក្រែន បានណែនាំឲ្យកាត់ផ្តាច់ចរន្តអគ្គិសនីជាបន្ទាន់ ស្របពេលមានការវាយប្រហាររបស់រុស្ស៊ី ។

ក្រុមហ៊ុនថាមពលឯកជន DTEK របស់អ៊ុយក្រែន និយាយថា ការកាត់ផ្តាច់ចរន្តអគ្គិសនី បានធ្វើឲ្យប៉ះពាល់ដល់តំបន់គីវ ក៏ដូចជាតំបន់ Odesa, Dnipropetrovsk និងតំបន់ Donetsk ។

កាលពីមុន រុស្ស៊ីធ្លាប់វាយប្រហារទ្រង់ទ្រាយធំ ១០លើកលើហេដ្ឋារចនាសម្ព័ន្ធថាមពលអ៊ុយក្រែន ដែលធ្វើឲ្យប៉ះពាល់ដល់ប្រព័ន្ធមួយនេះ និងបង្កឲ្យមានការព្រួយបារម្ភពីការកាត់ផ្តាច់ចរន្តអគ្គិសនីរយៈពេលយូរមុនខែរដូវរងា ។

អំឡុងការវាយប្រហារមីស៊ីលលើតំបន់ Rivne នាថ្ងៃព្រហស្បតិ៍នេះ អភិបាលតំបន់លោក Oleksandr Koval និយាយថា អ្នកប្រើប្រាស់ ២៨ម៉ឺននាក់ ត្រូវបានកាត់ផ្តាច់ចរន្តអគ្គិសនី ។ លោកបាននិយាយផងដែរពីការអាក់ខានការផ្គត់ផ្គង់ទឹកស្អាត ដោយលោកពុំបានបរិយាយពីការខូចខាតនោះទេ ។

អភិបាលទីក្រុង Lutsk បានរាយការណ៍ពីការកាត់ផ្តាច់ចរន្តអគ្គិសនី ក្រោយការវាយប្រហារជាច្រើនរបស់រុស្ស៊ី ហើយក្រុមសេវាកម្ម កំពុងធ្វើការដើម្បីតភ្ជាប់បណ្តាញទឹកស្អាត និងប្រើប្រាស់ជម្រើសថាមពលផ្សេងទៀត ។

អភិបាលតំបន់ Kharkiv លោក Oleh Syniehubov និយាយថា ការវាយប្រហារដោយមីស៊ីល លើទីក្រុង Kharkiv បានធ្វើឲ្យខូចខាតអគារធុរកិច្ច និងអគារស្នាក់នៅបណ្តោះអាសន្ន ៕