ក្រសួងការបរទេសចិន និយាយនៅថ្ងៃព្រហស្បតិ៍នេះថា ពលដ្ឋចិន ៣នាក់ដែលត្រូវបានដោះលែងក្នុងការដោះដូរអ្នកទោសជាមួយសហរដ្ឋអាមេរិក បានវិលត្រឡប់មកផ្ទះវិញដោយសុខសុវត្ថិភាព ។

អ្នកនាំពាក្យក្រសួងការបរទេសចិនអ្នកស្រី Mao Ning បានកត់សំគាល់ផងដែរថា អ្នករត់គេចម្នាក់ដែលបានរស់នៅសហរដ្ឋអាមេរិកអស់រយៈពេលជាច្រើនឆ្នាំ ត្រូវបានធ្វើមាតុភូមិនិវត្តន៍ផងដែរ ហើយចិននឹងបន្តកិច្ចខិតខំដើម្បីធ្វើមាតុភូមិនិវត្តន៍អ្នករត់គេច និងទទួលបានឧក្រិដ្ឋជនមកវិញ ។

អ្នកស្រី Mao និយាយថា ឋានសួគ៌មានសំណាញ់ធំធេង ប៉ុន្តែគ្មានអ្វីអាចគេចចេញពីវាបានឡើយ ហើយរដ្ឋាភិបាលរបស់អ្នកស្រី នឹងប្តេជ្ញាចិត្តរកវិធីដោះស្រាយ ដើម្បីធ្វើមាតុភូមិនិវត្តន៍ឧក្រិដ្ឋជនទាំងអស់មកវិញ ។

នៅក្នុងសេចក្តីអត្ថាធិប្បាយលើការបង្កើនការប្រុងប្រយ័ត្នរបស់សហរដ្ឋអាមេរិកសម្រាប់ការធ្វើដំណើរទៅចិន អ្នកស្រី Mao និយាយថា ចិនតែងតែជំទាស់ការបង្កើតឥទ្ធិពលបន្លាច ហើយសង្ឃឹមថា សហរដ្ឋអាមេរិក នឹងផ្តល់កន្លែងល្អប្រសើរជាងនេះ សម្រាប់ការផ្លាស់ប្តូរវប្បធម៌ និងបុគ្គលិក រវាងប្រទេសទាំង ២ ។

ចិនបានដោះលែងពលដ្ឋសហរដ្ឋអាមេរិកលោក Mark Swidan, Kai Li និងលោក John Leung ដែលបានធ្វើដំណើរទៅដល់មូលដ្ឋានចម្រុះ San Antonio ស្ថិតក្នុងរដ្ឋ Texas កាលពីថ្ងៃពុធ រយៈពេលប៉ុន្មានម៉ោងមុនថ្ងៃពិធីបុណ្យវិស្សមកាល Thanksgiving របស់សហរដ្ឋអាមេរិក ៕