ក្រសួងមហាផ្ទៃកាហ្សាក់ស្ថាន នៅថ្ងៃព្រហស្បតិ៍ (ទី២៨ ខែវិច្ឆិកា) នេះ បានឲ្យដឹងថា នគរបាលកាហ្សាក់ស្ថាន កំពុងស៊ើបអង្កេតការលេចឡើងមួយភ្លែតនូវទង់ជាតិអ៊ុយក្រែន នៅលើអេក្រង់ LED ដ៏ធំមួយ ក្នុងទីក្រុង Astana ក្នុងអំឡុងពេលមានដំណើរទស្សនកិច្ចរបស់ប្រធានាធិបតីរុស្ស៊ី លោក Vladimir Putin នៅទីនោះ។

ទង់ជាតិរបស់ប្រទេសអ៊ុយក្រែន ដែលមានខ្សែឆ្នូតផ្តេកពណ៌ខៀវ និងពណ៌លឿង បានបង្ហាញខ្លួនមួយភ្លែត កាលពីថ្ងៃពុធ (ទី២៧ ខែវិច្ឆិកា) ជំនួសឲ្យទង់ជាតិរបស់រុស្ស៊ី ដែលមាន ៣ពណ៌ ស ខៀវ និងក្រហម នៅលើអេក្រង់ដែលស្ថិតនៅលើផ្លូវដ៏សំខាន់មួយរបស់ទីក្រុង Astana។

លោក Putin បានស្ថិតនៅទីក្រុងរួចហើយ នាពេលនោះ ហើយអេក្រង់ត្រូវបានបិទភ្លាមមួយរំពេច ប៉ុន្តែរូបភាព និងវីដេអូនៃឧប្បត្តិហេតុនេះ ត្រូវបានចែកចាយយ៉ាងឆាប់រហ័ស នៅលើប្រព័ន្ធអ៊ីនធឺណិត។ ហើយក្រសួងមហាផ្ទៃបានឲ្យដឹងនៅក្នុងសេចក្តីថ្លែងការណ៍មួយថា ខ្លួនកំពុងពិនិត្យមើលការពន្យល់បកស្រាយដែលអាចមានទាំងអស់ ក្នុងនោះរួមទាំងបញ្ហាបច្ចេកទេស និងការវាយប្រហាររបស់ក្រុមចោរព័ត៌មានវិទ្យាផងដែរ។

គួររំលឹកថា យោងតាមការស្ទង់មតិដែលត្រូវបានធ្វើឡើងកាលពីឆ្នាំមុន ប្រជាជនកាហ្សាក់ស្ថានភាគច្រើនមានអព្យាក្រឹត ចំពោះសង្គ្រាមរុស្ស៊ី-អ៊ុយក្រែន ប៉ុន្តែក្នុងចំណោមអ្នកផ្សេងទៀត អ្នកគាំទ្រអ៊ុយក្រែនមានចំនួនច្រើនជាងអ្នកលម្អៀងទៅរុស្ស៊ី៕