យោងតាមការអះអាងរបស់ក្រសួងសុខាភិបាលប៉ាឡេស្ទីន បានឲ្យដឹងថា មនុស្សជាច្រើននាក់ ត្រូវបានសម្លាប់នៅថ្ងៃព្រហស្បតិ៍នេះ ពេលដែលការវាយប្រហាររបស់អ៊ីស្រាអែល ត្រូវចំជំរំ Nuseirat ស្ថិតក្នុងតំបន់ហ្កាហ្សា ។

អ្នករងគ្រោះថ្នាក់ ត្រូវបានមើលឃើញប្រញាប់ប្រញាល់បញ្ជូនទៅកាន់មន្ទីរពេទ្យ ហើយគ្រួសារនាំគ្នាកាន់ទុក្ខការបាត់បង់មនុស្សជាទីស្រលាញ់របស់ពួកគេ ពេលដែលពួកគេទ្រហោយំ បោកខ្លួនលើសាកសពមនុស្សនៅតាមផ្លូវ ។

ក្រុមគ្រូពេទ្យនិយាយថា ការវាយប្រហាររបស់យោធាអ៊ីស្រាអែល បានសម្លាប់ជនប៉ាឡេស្ទីនយ៉ាងហោច ១៧នាក់នៅទូទាំងតំបន់ហ្កាហ្សានាថ្ងៃព្រហស្បតិ៍នេះ ពេលដែលកងកម្លាំងអ៊ីស្រាអែល បង្កើនការទម្លាក់គ្រាប់បែកលើតំបន់ភាគកណ្តាល និងរុលរថក្រោះចូលកាន់តែជ្រៅទៅតំបន់ភាគខាងជើង និងតំបន់ភាគខាងត្បូនដែនដីបិទច្រកមួយនេះ ។

ការវាយប្រហារកើនឡើងនេះដែរ បានកើតមានឡើង រយៈពេល ១ថ្ងៃក្រោយអ៊ីស្រាអែល និងក្រុមហេសបូឡាគាំទ្រដោយអ៊ីរ៉ង់ ចាប់ផ្តើមអនុវត្តបទឈប់បាញ់នៅលីបង់ បញ្ចប់ជម្លោះរយៈពេលជាង ១ឆ្នាំរបស់ពួកគេ ហើយនិងធ្វើឲ្យកើតមានក្តីសង្ឃឹមក្នុងចំណោមជនប៉ាឡេស្ទីននៅតំបន់ហ្កាហ្សាថា កិច្ចព្រមព្រៀងស្រដៀងគ្នា នឹងកើតមានជាមួយក្រុមហាម៉ាស់ ដែលគ្រប់គ្រងតំបន់ហ្កាហ្សា ។

នៅជំរំ Nuseirat ដែលស្ថិតក្នុងចំណោមជំរំជនភៀសខ្លួនជាប្រវត្តិសាស្រ្តចំនួន ៨នៅតំបន់ហ្កាហ្សា យន្តហោះអ៊ីស្រាអែល បានបើកការវាយប្រហារតាមច្រកអាកាសជាច្រើនលើក ដោយបំផ្លិចបំផ្លាញអគារកម្ពស់ច្រើនជាន់ និងបំផ្លាញផ្លូវនៅក្រៅវិហារ ។ 

ក្រុមមន្រ្តីសុខភាព និយាយថា មនុស្សយ៉ាងហោច ៧នាក់ ត្រូវបានសម្លាប់នៅក្នុងការវាយប្រហារទាំងនេះ ។

គ្រូពេទ្យនិយាយថា មនុស្ស ២នាក់ ស្រ្តីម្នាក់ និងកុមារម្នាក់ ត្រូវបានសម្លាប់នៅក្នុងការផ្លោងគ្រាប់កាំភ្លើងធំរបស់រថក្រោះ លើតំបន់ភាគលិចជំរំ Nuseirat ខណៈដែលការវាយប្រហារតាមច្រកអាកាស សម្លាប់មនុស្ស ៥នាក់នៅក្នុងផ្ទះក្បែរនោះ ៕