ប្រទេសចិន នៅថ្ងៃព្រហស្បតិ៍ (ទី២៨ ខែវិច្ឆិកា) នេះ បានព្រមានថា ខ្លួននឹងចាត់ «វិធានការចាំបាច់» នានា ដើម្បីការពារក្រុមហ៊ុនចិន ប្រសិនបើសហរដ្ឋអាមេរិកបង្កើនវិធានការគ្រប់គ្រងបន្ទះឈីប បន្ទាប់ពីមានរបាយការណ៍ថា រដ្ឋបាលរបស់លោក Joe Biden អាចបង្ហាញការរឹតបន្តឹងការនាំចេញថ្មីឲ្យបានលឿន ក្នុងសប្តាហ៍នេះ។

កាលពីសប្តាហ៍មុន សភាពាណិជ្ជកម្មអាមេរិក បានជូនដំណឹងដល់សមាជិកតាមរយៈអ៊ីម៉ែល (សារអេឡិកត្រូនិក) ថា រដ្ឋបាល លោក Biden កំពុងពិចារណាបន្ថែមក្រុមហ៊ុនបន្ទះឈីបរបស់ចិនចំនួនរហូតដល់ ២០០ក្រុមហ៊ុន ទៅក្នុងបញ្ជីខ្មៅពាណិជ្ជកម្ម ដែលនឹងរារាំងក្រុមហ៊ុនផ្គត់ផ្គង់សហរដ្ឋអាមេរិកភាគច្រើនមិនឲ្យដឹកជញ្ជូនទៅកាន់ក្រុមហ៊ុនទាំងនោះ។

នៅពេលត្រូវបានសួរអំពីរបាយការណ៍ ក្នុងសន្និសីទសារព័ត៌មានប្រចាំថ្ងៃ នាថ្ងៃព្រហស្បតិ៍នេះ អ្នកនាំពាក្យក្រសួងពាណិជ្ជកម្ម លោក He Yadong បានឆ្លើយតបថា ប្រទេសចិន «ប្រឆាំងយ៉ាងខ្លាំងក្លា» នូវអ្វីដែលលោកបាននិយាយថា សហរដ្ឋអាមេរិកកំពុងពង្រីកគំនិតសន្តិសុខជាតិ និង «ការរំលោភបំពាន» តាមរយៈវិធានការត្រួតពិនិត្យដែលផ្តោតលើក្រុមហ៊ុនចិន។

គួរបញ្ជាក់ថា សហរដ្ឋអាមេរិក បាន និងកំពុងរឹតបន្តឹងការគ្រប់គ្រងលើឧបករណ៍អេឡិចត្រូនិក ចំពេលមានការភ័យខ្លាចថា ចិនអាចប្រើប្រាស់បច្ចេកវិទ្យាកម្រិតខ្ពស់ ដើម្បីពង្រឹងយោធារបស់ខ្លួន។

លោក He Yadong បាននិយាយថា៖ «សកម្មភាពទាំងនេះរំខានយ៉ាងខ្លាំងដល់សណ្តាប់ធ្នាប់សេដ្ឋកិច្ច និងពាណិជ្ជកម្មអន្តរជាតិ ធ្វើឲ្យមានអស្ថិរភាពដល់សន្តិសុខឧស្សាហកម្មសកល និងប៉ះពាល់ដល់កិច្ចប្រឹងប្រែងសហប្រតិបត្តិការ រវាងប្រទេសចិន និងសហរដ្ឋអាមេរិក ក៏ដូចជាឧស្សាហកម្មបន្ទះអេឡិចត្រូនិកសកល»។ ហើយលោកបានបន្ថែមថា៖ «ប្រសិនបើសហរដ្ឋអាមេរិកទទូចបង្កើនវិធានការត្រួតពិនិត្យខ្លាំងឡើងៗនោះ ប្រទេសចិននឹងចាត់វិធានការចាំបាច់នានា ដើម្បីការពារយ៉ាងម៉ឺងម៉ាត់នូវសិទ្ធិស្របច្បាប់របស់សហគ្រាសចិន»៕