ក្រសួងការពារជាតិចិន បានសន្យាជំនះរាល់ការប៉ុនប៉ងទាំងអស់ចំពោះទង្វើអបគមន៍ ហើយនិងជំរុញឲ្យសហរដ្ឋអាមេរិក មិនត្រូវបញ្ជូនសារខុសនោះទេលើឯករាជ្យរបស់កោះតៃវ៉ាន់ មុនដំណើរទស្សនកិច្ចរបស់មេដឹកនាំកោះតៃវ៉ាន់លោក Lai Ching-te ទៅកាន់រដ្ឋ Hawaiiរបស់សហរដ្ឋអាមេរិក ដែលជាផ្នែកមួយនៃដំណើរទស្សនកិច្ចក្នុងតំបន់ប៉ាស៊ីហ្វិក ។

អ្នកនាំពាក្យក្រសួងការពារជាតិចិន និយាយនៅថ្ងៃព្រហស្បតិ៍នេះថា មន្រ្តីម្នាក់ក្នុងចំណោមមន្រ្តីយោធាជាន់ខ្ពស់បំផុតរបស់ចិន ត្រូវបានព្យួរការងារ ហើយនិងស្ថិតក្រោមការស៊ើបអង្កេតសម្រាប់ការបំពានបទវិន័យធ្ងន់ធ្ងរ ក្រោយសេចក្តីរាយការណ៍ពីការស៊ើបអង្កេតពុករលួយរបស់រដ្ឋមន្រ្តីការពារជាតិ កាលពីដើមសប្តាហ៍នេះ ។

មន្រ្តីព្យួរការងារ គឺលោកឧត្តមនាវី Miao Hua បម្រើការងារក្រោមការដឹកនាំរបស់លោកប្រធានាធិបតី Xi Jinping នៅគណកម្មការយោធាកណ្តាល ដែលជាអង្គភាពយោធាកម្រិតខ្ពស់បំផុតរបស់ចិន ។ ក្រសួងការពារជាតិចិន ពុំបានផ្តល់សេចក្តីលម្អិតបន្ថែមទៀតនោះទេ ។

ជាការឆ្លើយតបនឹងសេចក្តីរាយការណ៍ក្នុងសប្តាហ៍នេះថា រដ្ឋមន្រ្តីក្រសួងការពារចិនលោក Dong Jun ត្រូវបានស៊ើបអង្កេតដែលជាផ្នែកមួយនៃការស៊ើបអង្កេតប្រឆាំងអំពើពុករលួយទ្រង់ទ្រាយធំ ដោយយោងតាមការអះអាងរបស់មន្រ្តីបច្ចុប្បន្ន និងអតីតសហរដ្ឋអាមេរិក អ្នកនាំពាក្យក្រសួងការពារជាតិចិនលោក Wu Qian និយាយថា ទាំងនេះ គឺជាការប្រឌិតរឿងសុទ្ធសាធ ។

ជាការឆ្លើយតបនឹងសំនួររបស់សារព័ត៌មានពីរដ្ឋមន្រ្តីក្រសួងការពារជាតិប្រទេសទាំង ២ ពុំជួបគ្នានៅប្រទេសឡាវកាលពីដើមខែនេះ លោក Wu បានឆ្លើយថា ចិនមានគោលការណ៍របស់ខ្លួន សម្រាប់ការបង្កើតទំនាក់ទំនងយោធាជាមួយសហរដ្ឋអាមេរិក ៕