ប្រមុខគោលនយោបាយការបរទេសជិតផុតអាណត្តិរបស់សហភាពអឺរ៉ុប (EU) លោក Josep Borrell នៅថ្ងៃព្រហស្បតិ៍ (ទី២៨ ខែវិច្ឆិកា) បានអំពាវនាវឲ្យរដ្ឋសមាជិកទាំងអស់របស់ EU គោរពដល់ការសម្រេចរបស់តុលាការឧក្រិដ្ឋកម្មអន្តរជាតិ (ICC) ក្នុងនោះរួមទាំងការចេញដីកាចាប់ខ្លួន ចំពោះនាយករដ្ឋមន្ត្រីអ៊ីស្រាអែល លោក Benjamin Netanyahu ផងដែរ។

នៅទីក្រុងប្រ៊ុចសែល ប្រទេសបែលហ្ស៊ិក លោក Borrell ដែលអាណត្តិរបស់លោកជាអ្នកការទូតជាន់ខ្ពស់របស់ EU នឹងបញ្ចប់ក្នុងខែនេះ បានប្រាប់អ្នកសារព័ត៌មានថា៖ «យើងមិនអាចធ្វើឲ្យខូចដល់តុលាការឧក្រិដ្ឋកម្មអន្តរជាតិបានទេ។ ស្ថាប័ននេះ គឺជាផ្លូវតែមួយគត់ដែលនាំទៅរកយុត្តិធម៌ពិភពលោក»។

លោកបានបន្ថែមថា៖ «អ្នកធ្វើការក្នុងនោះ មិនមែនជាផ្នែកនយោបាយទេ។ នេះជាស្ថាប័នច្បាប់ដែលត្រូវបានបង្កើតឡើងដោយមនុស្សដ៏គួរឲ្យគោរព ដែលជាបុគ្គលល្អបំផុត ក្នុងចំណោមអ្នកមានវិជ្ជាជីវៈចៅក្រម»។

គួរបញ្ជាក់ថា ICC បានចេញដីកាចាប់ខ្លួន កាលពីសប្តាហ៍មុន ចំពោះលោក Netanyahu អតីតប្រមុខការពារជាតិរបស់លោក គឺលោក Yoav Gallant និងជាមេដឹកនាំក្រុមហាម៉ាស ពីបទប្រព្រឹត្តឧក្រិដ្ឋកម្មសង្គ្រាម និងឧក្រិដ្ឋកម្មប្រឆាំងមនុស្សជាតិ ក្នុងជម្លោះ នៅតំបន់ហ្កាហ្សា។

ហើយទោះបីជាប្រទេសជាសមាជិកទាំងអស់របស់ EU ជាហត្ថលេខីនៃសន្ធិសញ្ញាបង្កើត ICC ក៏ដោយ ក៏ប្រទេសបារាំង បាននិយាយកាលពីថ្ងៃពុធថា ខ្លួនជឿថា លោក Netanyahu មានអភ័យឯកសិទ្ធិរួចពីវិធានការរបស់ ICC ព្រោះអ៊ីស្រាអែលមិនបានចុះហត្ថលេខាក្នុងច្បាប់របស់តុលាការនេះទេ៕