រដ្ឋមន្ត្រីការបរទេសអ៊ីស្រាអែល លោក Gideon Saar នៅថ្ងៃព្រហស្បតិ៍ (ទី២៨ ខែវិច្ឆិកា) នេះ បាននិយាយថា លោកជឿជាក់ថា សហរដ្ឋអាមេរិកនឹងដាក់ទណ្ឌកម្មតុលាការឧក្រិដ្ឋកម្មអន្តរជាតិ (ICC) ជុំវិញការចេញដីកាចាប់ខ្លួន ចំពោះនាយករដ្ឋមន្ត្រី លោក Benjamin Netanyahu និងអតីតរដ្ឋមន្ត្រីការពារជាតិរបស់លោក។

អ៊ីស្រាអែលបានឲ្យដឹងថា ខ្លួននឹងប្តឹងឧទ្ធរណ៍ជំទាស់នឹងការសម្រេចរបស់ ICC ដែលធ្វើឡើងប្រឆាំងនឹងលោក Netanyahu និងលោក Yoav Gallant ពាក់ព័ន្ធនឹងការចោទប្រកាន់ពីបទប្រព្រឹត្តឧក្រិដ្ឋកម្មសង្រ្គាម និងឧក្រិដ្ឋកម្មប្រឆាំងមនុស្សជាតិ ក្នុងជម្លោះ នៅតំបន់ហ្កាហ្សា។ ប៉ុន្តែក្នុងដំណើរទស្សនកិច្ច នៅសាធារណរដ្ឋឆែក លោក Saar បាននិយាយថា ប្រទេសផ្សេងទៀតក៏ស្រងាកចិត្តនឹងការសម្រេចនេះ ក្នុងរួមទាំងសហរដ្ឋអាមេរិកផងដែរ។

នៅឯសន្និសីទសារព័ត៌មានរួមជាមួយរដ្ឋមន្ត្រីការបរទេសឆែក លោក Jan Lipavsky លោក Saar បានប្រាប់ថា៖ «ខ្ញុំជឿថា នៅទីក្រុងវ៉ាស៊ីនតោន ច្បាប់នឹងកើតឡើងក្នុងពេលដ៏ខ្លីខាងមុខនេះ ប្រឆាំងនឹង ICC ហើយអ្នកដែលសហការជាមួយស្ថាប័ននេះ»។

លោក Saar បានបន្តថា អ៊ីស្រាអែលនឹងបញ្ចប់សង្គ្រាមរយៈពេល ១៤ខែ នៅតំបន់ហ្កាហ្សា នៅពេលដែលអាច «សម្រេចបាននូវគោលបំណងរបស់ខ្លួន» នោះគឺការវិលត្រឡប់មកវិញរបស់ចំណាប់ថ្នូរដែលត្រូវបានចាប់ខ្លួនដោយក្រុមហាម៉ាស និងការធានាឲ្យបានថា ក្រុមអ៊ិស្លាមមួយនេះលែងគ្រប់គ្រងដែនដីប៉ាឡេស្ទីនតទៅទៀត។

ជាចុងក្រោយ លោក Saar បានសង្កត់ធ្ងន់ថា អ៊ីស្រាអែលមិនមានបំណងគ្រប់គ្រងជីវិតជនស៊ីវិល នៅក្នុងតំបន់ហ្កាហ្សានោះទេ ដោយបន្ថែមថា សន្តិភាព គឺជាអ្វី «ដែលត្រូវតែកើតឡើងដោយចៀសមិនរួច» ប៉ុន្តែមិនអាចផ្អែកលើ «ការបំភ័ន្ត» បានឡើយ៕