ប្រទេសកូរ៉េខាងត្បូងមានអារម្មណ៍ថាបានរងផលប៉ះពាល់យ៉ាងខ្លាំងពីការធ្លាក់ព្រិលធ្ងន់ធ្ងរបំផុតក្នុងកំណត់ត្រា ខណៈប្រទេសនេះរាយការណ៍ពីការស្លាប់កើនឡើងដល់៦នាក់ ស្របពេលមានការលុបចោលការធ្វើដំណើរទាំងតាមអាកាស និងផ្លូវទឹក។

ទីក្រុងសេអ៊ូលបានកត់ត្រាការធ្លាក់ព្រិលច្រើនបំផុតទីបីរបស់ខ្លួនចាប់តាំងពីក្រុមមន្ត្រីបានចាប់ផ្តើមរក្សាកំណត់ត្រាក្នុងឆ្នាំ១៩០៧ ដោយព្រិលមានកម្រាស់ជាង១៦ អ៊ីញនៅក្នុងផ្នែកខ្លះ នៃទីក្រុងនេះ ដែលបង្ខំឱ្យលុបចោលជើងហោះហើរជាង ១៤០ និងផ្លូវនាវាចម្លងចំនួន ៧៦។

យោងតាមសារព័ត៌មានអង់គ្លេស The Independent បានឱ្យដឹងថាផងដែរថា ក្រុមអាជ្ញាធរក៏បានបិទសាលារៀនជិត១.៣០០កន្លែង ហើយលំនៅឋានជាច្រើនគ្មានអគ្គិសនីប្រើប្រាស់ដោយសារព្យុះដ៏ខ្លាំងខុសពីធម្មតា។ រដ្ឋាភិបាលទីក្រុងសេអ៊ូលបានពង្រាយបុគ្គលិកជាង១១.០០០នាក់ ដើម្បីព្យាយាមសម្អាតផ្លូវ និងកាត់បន្ថយការលំបាកសម្រាប់ចរាចរណ៍។

ទោះជាយ៉ាងណាក្តីទុក្ខព្រួយធ្ងន់ធ្ងរជាងនេះ គឺមានរបាយការណ៍នៃការស្លាប់មនុស្សដោយសារបញ្ហាទាក់ទងនឹងអាកាសធាតុនេះ។ មកទល់ពេលនេះ មនុស្ស៦នាក់បានស្លាប់ដោយសារគ្រោះថ្នាក់ចរាចរណ៍តាមដងផ្លូវ។

ក្រុមអាជ្ញាធរបានព្រមានដល់អ្នកស្រុកនៅក្នុងខេត្តមួយចំនួនដូចជាខេត្ត ជុងឈឹង(Chungcheong) និងខេត្តចេឡា (Jeolla) ឱ្យត្រៀមទប់ទល់ការធ្លាក់ព្រិលបន្ថែមទៀតនៅថ្ងៃសុក្រនេះ។ គេរំពឹងថាតំបន់ខ្លះទៀតអាចនឹងមើលឃើញព្រិលធ្លាក់បន្តរហូតដល់ព្រឹកថ្ងៃសៅរ៍ស្អែកនេះ៕