ការិយាល័យរបស់នាយករដ្ឋមន្ត្រី និងនគរបាល បាននិយាយកាលពីថ្ងៃព្រហស្បតិ៍ថា មនុស្ស ១៥នាក់បានស្លាប់ និងយ៉ាងហោចណាស់១០០នាក់ផ្សេងទៀតកំពុងបាត់ខ្លួន បន្ទាប់ពីបំណាក់ដី បង្កឡើងដោយភ្លៀងធ្លាក់ខ្លាំង បានកប់លើលំនៅឋានរាប់សិបខ្នងនៅទូទាំងភូមិជាច្រើននៅភាគខាងកើតប្រទេសអ៊ូហ្កង់ដា ។

បំណាក់ដី បានកើតឡើង នៅក្នុងស្រុក Bulambuli មានចម្ងាយប្រហែល ៣០០ គីឡូម៉ែត្រ ភាគខាងកើតរដ្ឋធានី Kampala ។ សង្គមកាកបាទក្រហមរបស់ប្រទេសអ៊ូហ្កង់ដា បាននិយាយនៅក្នុងសេចក្តីថ្លែងការណ៍ថា ប្រជាជនយ៉ាងហោចណាស់៤០គ្រួសារ ត្រូវបានកប់ដោយបំណាក់ដីទាំងស្រុង ខណៈលំនៅឋានផ្សេងទៀតបានរងការខូចខាតដោយផ្នែក។

នគរបាលនិយាយថា មនុស្សចំនួន១១៣នាក់បានបាត់ខ្លួន ហើយផ្លូវជាច្រើនខ្សែដែលពុំអាចឆ្លងកាត់បាន កំពុងតែរារាំងយានយន្ត រួមទាំងរថយន្តគិលានសង្គ្រោះពីប្រតិបត្តិការជួយសង្គ្រោះ។

ប្រទេសអ៊ូហ្កង់ដា បានរងការវាយប្រហារដោយភ្លៀងធ្លាក់ខ្លាំងខុសប្រក្រតី ចាប់តាំងពីខែតុលា ដែលបានបង្កឱ្យមានទឹកជំនន់ និងបំណាក់ដីរាលដាល នៅក្នុងតំបន់មួយចំនួន។

តំបន់ ដែលបំណាក់ដី បានកើតឡើងគឺជាតំបន់ភ្នំ ហើយធ្លាប់ជួបប្រទះគ្រោះមហន្តរាយស្រដៀងគ្នាកាលពីពេលមុន រួមទាំងការបាក់រលាយផ្ទាំងទឹកកកក្នុងឆ្នាំ ២០១០ ដែលបានបណ្តាលមនុស្សយ៉ាងហោចណាស់ ៨០នាក់ស្លាប់។