ទីក្រុងប៉េកាំង នៅថ្ងៃព្រហស្បតិ៍ (២៨ វិច្ឆិកា) បាននិយាយថា ខ្លួនកំពុងធ្វើការល្បាតតាមអាកាស និងជើងទឹក ជុំវិញដែនទឹកជម្លោះមួយក្នុងសមុទ្រចិនខាងត្បូង ដើម្បី "ការពារយ៉ាងម៉ឺងម៉ាត់" នូវអធិបតេយ្យភាពជាតិរបស់ខ្លួន។

បញ្ជាការភាគខាងត្បូងរបស់យោធាចិន បាននិយាយនៅក្នុងសេចក្តីថ្លែងការណ៍មួយថា "ការល្បាតត្រៀមប្រយុទ្ធនេះ" គឺដើម្បីពង្រឹង "ភាពប្រុងប្រយ័ត្ននៅក្នុងសមុទ្រ និងលំហអាកាសជុំវិញតំបន់ដែនទឹក ហ័ងយាន តាវ (Huangyan Dao)" ដែលជាឈ្មោះចិន របស់ថ្មប៉ប្រះទឹក ស្កាបូរ៉ូ ស្ហូល (Scarborough Shoal) នៅសមុទ្រចិនខាងត្បូង។

សេចក្តីថ្លែងការណ៍បានបន្ថែមថា ប្រទេសចិន បានរៀបចំកងកម្លាំងទ័ពអាកាស និងជើងទឹកឱ្យល្បាតពេញមួយខែវិច្ឆិកា។ គួរបញ្ជាក់ថា ទីក្រុងប៉េកាំង បានអះអាងសិទ្ធិលើដែនទឹកនៅជុំវិញថ្មប៉ប្រះទឹក Scarborough Shoal ដែលខ្លួនទាមទារពីហ្វីលីពីន ក្នុងឆ្នាំ២០១២។

បណ្ដុំថ្មប៉ប្រះទឹករាងត្រីកោណនេះ ស្ថិតនៅចម្ងាយ ២៤០គីឡូម៉ែត្រ ពីភាគខាងលិចនៃកោះ លូហ្សូន (Luzon) របស់ហ្វីលីពីន និងជិត ៩០០គីឡូម៉ែត្រ ពីទឹកដីដ៏ធំបំផុតរបស់ប្រទេសចិន នៃកោះហៃណាន (Hainan)។ នាវាហ្វីលីពីន និងចិន បានប៉ះទង្គិចគ្នាជាញឹកញាប់ក្នុងឆ្នាំមុននៅដែនទឹកជម្លោះនោះ ដែលបណ្តាលឱ្យមានរបួស និងការខូចខាតជាច្រើន៕