ប្រធានាធិបតីរុស្ស៊ី លោក វ្ល៉ាឌីមៀ ពូទីន បានកោតសរសើរប្រធានាធិបតីជាប់ឆ្នោតរបស់សហរដ្ឋអាមេរិក លោក ដូណាល់ ត្រាំ កាលពីថ្ងៃព្រហស្បតិ៍ថា ជាអ្នកនយោបាយមានបទពិសោធន៍ និងឆ្លាតវៃ ប៉ុន្តែបាននិយាយថា លោកមិនជឿថា លោក Trump មានសុវត្ថិភាពទេ បន្ទាប់ពីមានការប៉ុនប៉ងលើជីវិតរបស់លោក។

លោក Trump បានរងរបួសនៅក្នុងការប៉ុនប៉ងធ្វើឃាតនៅរដ្ឋ Pennsylvania កាលពីខែកក្កដា។ នៅក្នុងឧបទ្ទវហេតុដាច់ដោយឡែកមួយទៀតកាលពីខែកញ្ញា បុរសម្នាក់ត្រូវបានចោទប្រកាន់ពីបទប៉ុនប៉ងធ្វើឃាត បន្ទាប់ពីតាមដែលចោទប្រកាន់ថាបានបង្ហាញខ្លួនដោយកាន់កាំភ្លើងនៅទីលានវាយកូនហ្គោលមួយកន្លែងរបស់លោកTrump ក្នុងរដ្ឋ Florida ។

ថ្លែងទៅកាន់អ្នកសារព័ត៌មាន ក្នុងប្រទេសកាហ្សាក់ស្ថាន បន្ទាប់ពីកិច្ចប្រជុំកំពូល លោក ពូទីន បាននិយាយថា លោកមានការភ្ញាក់ផ្អើលចំពោះរបៀបដែលយុទ្ធនាការបោះឆ្នោតរបស់សហរដ្ឋអាមេរិក បានលាតត្រដាង ដោយលោកបានលើកឡើងពី «វិធីសាស្ត្រគ្មានអរិយធម៌ ដែលត្រូវបានប្រើប្រាស់ដើម្បីប្រឆាំងលោក Trump និងរួមទាំងការប៉ុនប៉ងធ្វើឃាតលោក រហូតដល់ច្រើនដង»។

លោក ពូទីន បាននិយាយថា «តាមគំនិតរបស់ខ្ញុំ លោកTrump ពុំមានសុវត្ថិភាពទេ បច្ចុប្បន្ននេះ។ ខ្ញុំគិតថា លោក Trump ឆ្លាតវៃ ហើយខ្ញុំសង្ឃឹមថា លោកមានការប្រុងប្រយ័ត្ន និងយល់ច្រើនពីរឿងនេះ»។ លោក ពូទីន ដែលខ្លួនលោកផ្ទាល់ត្រូវបានការពារយ៉ាងរឹងមាំ បាននិយាយថា លោកកាន់តែតក់ស្លុត នៅពេលក្រុមគ្រួសារ និងកូនៗរបស់លោក Trump ត្រូវបានរិះគន់ដោយគូប្រជែងនយោបាយ ក្នុងអំឡុងពេលយុទ្ធនាការបោះឆ្នោតនៅសហរដ្ឋអាមេរិក។

លោកបានចាត់ទុកឥរិយាបថបែបនេះថាជា «ការបះបោរ» និងបាននិយាយថា នៅក្នុងប្រទេសរុស្ស៊ី សូម្បីតែ «ចោរព្រៃ» ក៏មិនប្រើវិធីសាស្រ្តបែបនេះដែរ។

ដោយនិយាយអំពីអ្វីដែលលោកបានពិពណ៌នាថា ជាការសម្រេចចិត្តរបស់រដ្ឋបាលលោក Biden ក្នុងការបង្កើនសង្រ្គាមនៅអ៊ុយក្រែន អនុញ្ញាតឱ្យទីក្រុងគីវ វាយប្រហារប្រទេសរុស្ស៊ីដោយមីស៊ីលរបស់ប្រទេសលោកខាងលិច លោក Putin បានប៉ាន់ប្រមាណថា វាអាចជានុយដែលអាចជួយលោក Trump ឲ្យលោកផ្តល់អ្វីមួយក៏ថាបាន ឬធ្វើឲ្យជីវិតរបស់លោកTrump កាន់តែលំបាក ជាមួយរុស្ស៊ី ក៏ថាបាន។