មន្ត្រីអង្គការសុខភាពពិភពលោកមួយរូប កាលពីថ្ងៃព្រហស្បតិ៍ បានអំពាវនាវឱ្យមានការតាមដានកាន់តែខ្លាំងលើសត្វពាហនៈ សម្រាប់ភស្តុតាងនៃការឆ្លងជំងឺផ្តាសាយបក្សី H5N1 ដើម្បីទប់ស្កាត់ការរាលដាលជំងឺនេះ។ មន្ត្រីរូបនេះ ក៏បានជំរុញឱ្យមានការខិតខំប្រឹងប្រែងកាន់តែខ្លាំងឡើង ដើម្បីកាត់បន្ថយហានិភ័យនៃការចម្លងវីរុសទៅកាន់ប្រភេទសត្វថ្មី និងឆ្លងដល់មនុស្ស។

អ្នកជំនាញជំងឺរាតត្បាតរបស់អង្គការសុខភាពពិភពលោក លោកស្រី Maria Van Kerkhove បាននិយាយក្នុងសន្និសីទសារព័ត៌មានតាមបណ្តាញអ៊ីនធឺណិតថា អ្វីដែលយើងពិតជាត្រូវការជាសកល ទាំងនៅសហរដ្ឋអាមេរិក និងនៅបរទេស គឺការតាមដានកាន់តែខ្លាំងលើសត្វ បក្សីព្រៃ បសុបក្សី និងសត្វដែលគេដឹងថាងាយឆ្លងវីរុសនេះ។

ទីភ្នាក់ងារនេះបាននិយាយថា ខ្លួនកំពុងទាក់ទងជាមួយភ្នាក់ងារជាដៃគូ ដូចជាអង្គការពិភពលោកសម្រាប់សុខភាពសត្វ និងអង្គការស្បៀងអាហារនិងកសិកម្ម ដើម្បីបង្កើនការតាមដានសត្វ។

ក្រសួងកសិកម្មសហរដ្ឋអាមេរិក កាលពីខែមុនបានបញ្ជាក់ពីវត្តមានជំងឺផ្តាសាយបក្សី H5N1 លើសត្វជ្រូក នៅកសិដ្ឋានមួយកន្លែងក្នុងរដ្ឋ Oregon ។

សត្វជ្រូក បង្ហាញការព្រួយបារម្ភជាក់លាក់មួយសម្រាប់ការរាលដាលជំងឺផ្តាសាយបក្សី ដោយសារតែ វាអាចឆ្លងទាំងបក្សី និងមនុស្ស ដែលអាចផ្លាស់ប្តូរហ្សែនដើម្បីបង្កើតជាវីរុសដ៏គ្រោះថ្នាក់ថ្មី ឆ្លងទៅមនុស្សបានយ៉ាងងាយស្រួល។

យោងតាមមជ្ឈមណ្ឌលគ្រប់គ្រង និងបង្ការជំងឺរបស់សហរដ្ឋអាមេរិក បានឲ្យដឹងថា រហូតមកដល់ពេលនេះ ករណីជំងឺផ្តាសាយបក្សី H5N1 លើមនុស្សមានចំនួន៥៥ករណី រួមទាំងកុមារផងដែរ ដែលត្រូវបានរាយការណ៍នៅក្នុងសហរដ្ឋអាមេរិក ក្នុងឆ្នាំនេះ ។