យោងតាមសេចក្តីថ្លែងការណ៍របស់គណៈរដ្ឋមន្ត្រីប្រទេសលីបង់ បានឲ្យដឹងថា នាយករដ្ឋមន្ត្រីលីបង់ លោក Najib Mikati បានជំរុញឱ្យដាក់សម្ពាធលើអ៊ីស្រាអែល ឱ្យបញ្ឈប់ការរំលោភលើកិច្ចព្រមព្រៀងបទឈប់បាញ់ជាមួយក្រុមហេសបូឡា។

លោក Mikati បានថ្លែងក្នុងអំឡុងពេលសន្ទនាតាមទូរស័ព្ទជាមួយប្រធានាធិបតីបារាំង លោក Emmanuel Macron ដែលភាគីទាំងពីរបានពិភាក្សាអំពីស្ថានភាពបច្ចុប្បន្ននៅក្នុងប្រទេសលីបង់ បន្ទាប់ពីបទឈប់បាញ់បានចូលជាធរមាន កាលពីព្រឹកថ្ងៃពុធ។ លោក Mikati បានអរគុណលោក Macron សម្រាប់ជំនួយរបស់លោកដើម្បីបញ្ឈប់ការឈ្លានពានរបស់អ៊ីស្រាអែល និងបានឈានដល់ការយោគយល់ក្នុងរឿងនេះ។

លោក Mikati និយាយថា ការបំពានកាលពីថ្ងៃព្រហស្បតិ៍លើកិច្ចព្រមព្រៀងបទឈប់បាញ់ បានបណ្តាលឱ្យមានមនុស្សរងរបួស និងបង្កការខូចខាតច្រើន។

នៅក្នុងការរំលោភលើកិច្ចព្រមព្រៀងលើកដំបូង ការវាយប្រហារតាមអាកាសរបស់អ៊ីស្រាអែល បានធ្លាក់លើរថយន្តមួយគ្រឿង ក្នុងភូមិភាគអាគ្នេយ៍ទីក្រុង Markaba បានបណ្តាលឱ្យជនជាតិលីបង់ពីរនាក់រងរបួស។ ក្រោយមក ប្រភពពីយោធាលីបង់ បាននិយាយថា យានដ្រូនរបស់អ៊ីស្រាអែល បានវាយឆ្មក់លើការប្រមូលផ្តុំមួយ នៅក្នុងភូមិ Taybeh ធ្វើឱ្យមនុស្សបួននាក់ផ្សេងទៀត រងរបួស។

កាលពីថ្ងៃព្រហស្បតិ៍ កងកម្លាំងការពារអ៊ីស្រាអែល (IDF) បានបញ្ជាក់ថា ខ្លួនបានធ្វើការវាយប្រហារដោយយានដ្រូននៅភាគខាងត្បូងប្រទេសលីបង់ ដោយចាត់ទុកថា វាជាការបាញ់ព្រមាន។

កងកម្លាំងIDF និយាយថា «ជនសង្ស័យ» ច្រើននាក់ មួយចំនួនជិះលើរថយន្ត បានចូលទៅក្នុងតំបន់នៅភាគខាងត្បូងប្រទេសលីបង់ ដោយរំលោភលើកិច្ចព្រមព្រៀងបទឈប់បាញ់។