សំណួរថាតើកម្មវិធីផែនទីប្រាប់ផ្លូវអាចទទួលខុសត្រូវបានទេ ប្រសិនបើអ្នកប្រើជួបឧបទ្ទវហេតុ គឺជារឿងដ៏ក្ដៅគគុកនៅឥណ្ឌា បន្ទាប់ពីបុរស ៣នាក់ស្លាប់ នៅពេលរថយន្តពួកគេបើកធ្លាក់ស្ពានដែលមិនទាន់ជួសជុលរួច ចូលទន្លេនៅរដ្ឋ អ៊ូតា ប្រទេស (Uttar Pradesh) ភាគខាងជើង។

នគរបាលនៅតែកំពុងស៊ើបអង្កេតឧប្បត្តិហេតុដែលបានកើតឡើងកាលពីថ្ងៃអាទិត្យ សប្ដាហ៍មុននេះ ប៉ុន្តែពួកគេជឿថាកម្មវិធី Google Maps បាននាំជនរងគ្រោះឱ្យធ្វើដំណើរតាមផ្លូវនោះ។

ផ្នែកមួយនៃស្ពានត្រូវបានគេរាយការណ៍ថាដួលរលំកាលពីដើមឆ្នាំដោយសារទឹកជំនន់ ហើយខណៈដែលអ្នកស្រុកបានដឹងរឿងនេះគ្រប់គ្នា បុរសទាំងបីនាក់នេះមិនបានដឹងអ្វីឡើយ ព្រោះមិនមានរនាំង ឬស្លាកសញ្ញាណាដែលបញ្ជាក់ថាស្ពាននេះមិនទាន់សាងសង់រួចទេ។

សោកនាដកម្មនេះបានគូសបញ្ជាក់ពីហេដ្ឋារចនាសម្ព័ន្ធផ្លូវថ្នល់មិនល្អរបស់ឥណ្ឌា ហើយក៏បានបង្កឱ្យមានការជជែកវែកញែកថា តើកម្មវិធីផែនទីដូចជា Google Maps មានចំណែកទទួលខុសត្រូវលើឧប្បត្តិហេតុបែបនេះដែរឬទេ។ អ្នកខ្លះបន្ទោសកម្មវិធីនេះថាមិនបានផ្តល់ព័ត៌មានត្រឹមត្រូវ ខណៈអ្នកខ្លះទៀតប្រកែកថា វាជាបរាជ័យរបស់រដ្ឋាភិបាលចំពោះការមិនបិទកន្លែងខូចខាត។

Google Maps ដែលជាកម្មវិធីផែនទីដ៏ពេញនិយមបំផុតនៅឥណ្ឌា មានអ្នកប្រើប្រាស់សកម្មប្រហែល ៦០លាននាក់ ប៉ុន្តែជាញឹកញាប់ ត្រូវបានស្ថិតនៅក្រោមការត្រួតពិនិត្យដោយសារការផ្តល់ទិសដៅមិនត្រឹមត្រូវ ដែលជួនកាលនាំឱ្យមានគ្រោះថ្នាក់ដល់ជីវិត៕