ទីភ្នាក់ងារសារព័ត៌មានរដ្ឋរុស្ស៊ី បានរាយការណ៍ដោយដកស្រង់សេចក្តីថ្លែងការណ៍យោធាថា រដ្ឋមន្ត្រីការពារជាតិប្រទេសរុស្ស៊ី លោក Andrei Belousov បានទៅដល់ប្រទេសកូរ៉េខាងជើង នៅថ្ងៃសុក្រនេះ។

ក្នុងអំឡុងដំណើរទស្សនកិច្ចផ្លូវការរបស់លោក ទៅកាន់ទីក្រុងព្យុងយ៉ាង លោក Belousov នឹងជួបពិភាក្សាជាមួយមន្ត្រីនយោបាយកផ្នែកយោធា និងយោធារបស់ប្រទេសកូរ៉េខាងជើងមួយចំនួន។

យោងតាមសេចក្តីថ្លែងការណ៍បានឲ្យដឹងថា ប្រមុខការពារជាតិរុស្ស៊ី ត្រូវបានស្វាគមន៍នៅក្នុងទីក្រុងព្យុងយ៉ាង ដោយសមភាគីកូរ៉េខាងជើង លោក No Kwang Chol ។

ប្រទេសទាំងពីរ បានចុះហត្ថលេខាលើសន្ធិសញ្ញាភាពជាដៃគូយុទ្ធសាស្ត្រកាលពីខែមិថុនា ដែលកាតព្វកិច្ចនីមួយៗ ត្រូវផ្តល់ជំនួយផ្នែកយោធាដល់គ្នាទៅវិញទៅមក ក្នុងករណីមានការវាយប្រហារ និងសហការដើម្បីប្រឆាំងការដាក់ទណ្ឌកម្មរបស់ប្រទេសលោកខាងលិច។

សហរដ្ឋអាមេរិក និងប្រទេសកូរ៉េខាងត្បូង បានចោទប្រកាន់ប្រទេសកូរ៉េខាងជើងដែលមានអាវុធនុយក្លេអ៊ែរ ថា ប្រទេសនេះបានបញ្ជូនទាហានជាង១០.០០០នាក់ ដើម្បីទៅជួយរុស្ស៊ីប្រយុទ្ធជាមួយអ៊ុយក្រែន ដោយអ្នកជំនាញនិយាយថា មេដឹកនាំ លោក គីម ជុងអ៊ុន ចង់ទទួលបានបច្ចេកវិទ្យាទំនើប និងបទពិសោធន៍ប្រយុទ្ធ សម្រាប់កងទ័ពរបស់លោក ជាថ្នូរត្រឡប់មកវិញ។