ភ្នំពេញ៖ គិតចាប់ពីចុះហត្ថលេខាជាផ្លូវការលើកិច្ចព្រមព្រៀងពាណិជ្ជកម្មសេរីរវាងកម្ពុជា-កូរ៉េ គ្រោងនឹងចូលជាធរមាននៅដើមឆ្នាំ២០២២ខាងមុខ ពោលគឺរយៈពេល ៦០ថ្ងៃ បន្ទាប់ពីភាគីទាំងពីរបានបញ្ចប់នីតិវិធីផ្ទៃក្នុងរៀងៗខ្លួន។ នេះតាមការបញ្ជាក់របស់ឯកឧត្តមអនុរដ្ឋលេខាធិការក្រសួងពាណិជ្ជកម្ម។
ក្រោយបញ្ចប់ពិធីចុះហត្ថលេខាការលើកិច្ចព្រមព្រៀងពាណិជ្ជកម្មសេរីទ្វេភាគីកម្ពុជា-កូរ៉េ រវាងឯកឧត្តម ប៉ាន សូរស័ក្ដិ រដ្ឋមន្ត្រីក្រសួងពាណិជ្ជកម្មកម្ពុជា និងឯកឧត្តម YEO Han-Koo រដ្ឋមន្ត្រីពាណិជ្ជកម្ម និងឧស្សាហកម្មថាមពល នៃសាធារណរដ្ឋកូរ៉េ នៅព្រឹកថ្ងៃទី២៦ ខែតុលា ឆ្នាំ២០២១នេះ ឯកឧត្តម ប៉ែន សុវិជាតិ អនុរដ្ឋលេខាធិការ និងជាមន្រ្តីអ្នកនាំពាក្យក្រសួងពាណិជ្ជកម្ម បានមានប្រសាសន៍ប្រាប់ទូរទស្សន៍ព័ត៌មាន BTVថា កិច្ចព្រមព្រៀងនេះមានចំនួន ១០ជំពូក និង ១៣១មាត្រា រួមទាំងបុព្វកថា និងឧបសម្ព័ន្ធដែលគ្របដណ្តប់លើពាណិជ្ជកម្មទំនិញ រួមមានស្តង់ដារ បទប្បញ្ញត្តិបច្ចេកទេស និងនីតិវិធីវាយតម្លៃភាពអនុលោម វិធានការអនាម័យ និងភូតគាមអនាម័យ និងគ្របដណ្តប់ផងដែរលើឧបាស្រ័យពាណិជ្ជកម្ម វិធានដើមកំណើត នីតិវិធីគយ និងកិច្ចសម្រួលពាណិជ្ជកម្ម កិច្ចសហប្រតិបត្តិការសេដ្ឋកិច្ច តម្លាភាព យន្តការដោះស្រាយវិវាទ អញ្ញត្រកម្ម ការរៀបចំស្ថាប័ន និងអវសានប្បញ្ញត្តិ។
ឯកឧត្តមបានបន្ថែមថា តាមរយៈកិច្ចព្រមព្រៀងនេះដែរ នឹងជំរុញកំណើននៃការនាំចេញកំណើនផលទុនសរុបក្នុងស្រុក និងកំណើនឱកាសការងារ ព្រមទាំងជួយស្តារឡើងវិញនូវសេដ្ឋកិច្ចរបស់ប្រទេសទាំងពីរបានឆាប់រហ័ស ដែលទទួលរងផលប៉ះពាល់ជំងឺកូវីដ-១៩។ ជាមួយគ្នានេះ ឯកឧត្តមអំពាវនាវដល់វិស័យឯកជន និងធុរកិច្ចជន ឲ្យខិតខំធ្វើយ៉ាងណាពង្រឹងសមត្ថភាពនូវការផលិត ជាពិសេសគុណភាពទំនិញ ពីព្រោះយើងនឹងអាចឈានទៅរកគុណភាពជាលក្ខណៈអន្តរជាតិនាពេលអនាគត។
កិច្ចព្រមព្រៀងពាណិជ្ជកម្មសេរីកម្ពុជា-កូរ៉េ មានគោលបំណងពង្រឹងភាពជាដៃគូសេដ្ឋកិច្ច និងពង្រីកការធ្វើសេរីភាវូបនីយកម្មពាណិជ្ជកម្មទ្វេភាគីឲ្យកាន់តែទំលំទូលាយ ដោយផ្ដល់ប្រយោជន៍ឲ្យគ្នាទៅវិញទៅមក សំដៅបង្កើនផលប្រយោជន៍សេដ្ឋកិច្ច និងសុខមាលភាពប្រជាជន និងធុរកិច្ចនៃប្រទេសទាំងពីរ។
សូមបញ្ជាក់ថា គិតត្រឹមរយៈពេល ៨ខែ ឆ្នាំ២០២១នេះ ទំហំពាណិជ្ជកម្មទ្វេរភាគីកម្ពុជា-កូរ៉េ សម្រេចបានចំនួនប្រមាណជាង ៥១៤លានដុល្លារ កើនឡើងជាង ១១% ប្រៀបធៀបនឹងរយៈពេលដូចគ្នានៅឆ្នាំ២០២០។ ក្នុងនោះទំនិញដែលនាំចេញពីកម្ពុជា មានដូចជា ភេសជ្ជៈ ឱសថ រថយន្តដឹកទំនិញ គ្រឿងអេឡិកត្រូនិក គ្រឿងសំអាង គ្រឿងម៉ាស៊ីន និងផលិតផលប្លាស្ទិកជាដើម...៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
