បុរាណវិទូបានបង្ហាញហ្វូស៊ីលដែលគេមានជំនឿថា មានអាយុកាលជាង ១០លានឆ្នាំរបស់ពពួកសត្វក្រពើដ៏កម្រនៅក្នុងទីក្រុង Limaកាលពីថ្ងៃព្រហស្បតិ៍ ។

លោក Mario Gamarra គឺជាបុរាណវិទូនៅវិទ្យាស្ថានភូមិសាស្រ្តរដ្ឋាភិបាលប៉េរូ បាននិយាយថា ហ្វូស៊ីលត្រូវគ្នានឹងពពួកសត្វក្រពើយក្ស Gharialមិនទាន់ពេញវ័យដែលមានបណ្តោយប្រវែងប្រហែល ៣-៤ម៉ែត្រ ហើយពេលវាធំពេញវ័យ វាមានបណ្តោយប្រវែងចន្លោះ ៨-៩ម៉ែត្រ ។

លោកថា ហ្វូស៊ីលនេះ ស្រដៀងគ្នាខ្លាំងនឹងហ្វូស៊ីលរបស់សត្វក្រពើ Piscogavialis ដែលរស់នៅតាមតំបន់ឆ្នេរប៉េរូ កាលពីរយៈប្រមាណជា ១០-១២លានឆ្នាំមុន ។

លោកបន្តថា ដូចអ្នកឃើញថាហើយថា គ្រោងឆ្អឹងមានលក្ខណៈច្រើនកំណាត់ និងលក្ខណៈពេញលេញ ។ យើងនៅខ្វះដៃឆ្វេង និងកន្ទុយរបស់វាប៉ុណ្ណោះ ។ ជាការពិតណាស់ថា រឿងដែលគួរចាប់អារម្មណ៍ជាងគេបំផុតគឺផ្នែកខាងក្រោយ ជើងឆ្វេង និងជើងស្តាំ ហើយលើសពីនេះទៅទៀត ពួកយើងមានឆ្អឹងជំនី និងដៃស្តាំ ។

ហ្វូស៊ីលដែលត្រូវបានរកឃើញនៅតំបន់វាលខ្សាច់សម្បូរហ្វូស៊ីល Ica របស់ប៉េរូនេះ ខ្វះផ្នែកខ្លះនៃជើងឆ្វេងរបស់វា និងកន្ទុយរបស់វា ប៉ុន្តែវាគួរឲ្យកត់សំគាល់ខ្លាំងណាស់ ដោយសារគុណភាពរបស់វាត្រូវបានអភិរក្សបានយ៉ាងល្អ ។

សូមបញ្ជាក់ថា ពពួកសត្វក្រពើ Gharial បច្ចុប្បន្នមាននៅតែអាស៊ីប៉ុណ្ណោះ ប៉ុន្តែរបកគំហើញនេះ បង្ហាញថា វារស់នៅអាមេរិកខាងត្បូងផងដែរ អំឡុងសម័យបុរាណ ៕