ព្យុះព្រិលនៅភាគឦសានសហរដ្ឋអាមេរិក បានធ្វើឲ្យគំនរព្រិលមានកម្ពស់លើសពី ១៥សង់ទីម៉ែត្រ ក្នុងតំបន់មួយចំនួន កាលពីរសៀលថ្ងៃព្រហស្បតិ៍ (ទី២៨ ខែវិច្ឆិកា) ខណៈដែលព្រិលកម្ពស់ជាច្រើនហ្វីត ត្រូវបានរំពឹងទុកថា នឹងមាននៅតាមបណ្តោយតំបន់ Great Lakes នាចុងសប្តាហ៍នេះ ដោយនាំឲ្យការធ្វើដំណើរក្នុងពិធីបុណ្យ Thanksgiving (សម្ដែងអំណរគុណ) មានគ្រោះថ្នាក់ សម្រាប់អ្នកបើកបរ។

ព្យុះនេះកំពុងធ្វើដំណើរទៅភាគខាងជើងពីភាគឦសាននៃរដ្ឋ Pennsylvania ជាកន្លែងដែលតំបន់មួយចំនួន នៅភាគខាងជើងរដ្ឋ Interstate 80 បានមានព្រិលកម្ពស់ដល់ទៅ ១០សង់ទីម៉ែត្រ កាលពីរសៀលថ្ងៃទី២៨ ខែវិច្ឆិកា។ ហើយបើយោងតាមសេវាអាកាសធាតុជាតិ បានឲ្យដឹងថា ព្រិលក៏កំពុងធ្លាក់ នៅភាគខាងជើងនៃរដ្ឋ New England ហើយកម្ពស់លើសពី ៣០សង់ទីម៉ែត្រ អាចមាននៅរដ្ឋ Maine និងភាគខាងជើងនៃរដ្ឋ New Hampshire។

គួរបញ្ជាក់ថា ការព្រមានអំពីព្យុះរដូវរងា បានចូលជាធរមាន រហូតដល់ម៉ោង ១ព្រឹក ម៉ោងក្នុងស្រុក នៅថ្ងៃសុក្រ (ទី២៩ ខែវិច្ឆិកា) នេះ សម្រាប់តំបន់មួយចំនួន នៅរដ្ឋ New York ក្នុងនោះរួមទាំងតំបន់ Fulton និង Schenectady ភាគខាងលិច និងសម្រាប់តំបន់ Bennington និងភាគខាងលិចតំបន់ Windham ក្នុងរដ្ឋ Vermont។

យោងតាមសមាគមយានយន្តអាមេរិក (AAA) បានឲ្យដឹងថា អ្នកបើកបរយានយន្តជិត ៧២លាននាក់ ត្រូវបានគេរំពឹងថា នឹងធ្វើដំណើរក្នុងពិធីបុណ្យ Thanksgiving។ ព្យុះនៅថ្ងៃទី២៨ ខែវិច្ឆិកា អាចរំខានដល់ការជួបជុំថ្ងៃឈប់សម្រាកនេះ៕