អ្នកស្រុកនៅតាមទីក្រុងភាគខាងជើងអ៊ីស្រាអែល បានវិលត្រឡប់ទៅកាន់តំបន់សហគមន៍របស់ពួកគេ ដើម្បីមើលផ្ទះ និងធុរកិច្ចរបស់ពួកគេ ក្រោយរយៈពេលជាង ១ឆ្នាំនៃការចាកចោលចេញពីទំបន់ព្រំដែនជាមួយលីបង់ ដោយសារសង្រ្គាមរយៈពេល ១៤ខែ ។

បទឈប់បាញ់ដែលត្រូវបានសម្របសម្រួលរវាងអ៊ីស្រាអែល និងក្រុមប្រដាប់អាវុធហេសបូឡារបស់លីបង់ បានចូលជាធរមានកាលពីព្រឹកថ្ងៃពុធ ។

តំបន់នៅតាមព្រំដែនអ៊ីស្រាអែលជាមួយលីបង់ ត្រូវបានប្រកាសជាតំបន់យោធាបិទជិត អំឡុងការផ្ទុះអាវុធ ហើយអ្នកស្រុកប្រហែល ៦ម៉ឺននាក់ ត្រូវបានជម្លៀសខ្លួន ចាប់តាំងពីក្រុមហេសបូឡា ចាប់ផ្តើមផ្លោងគ្រាប់រ៉ុក្កែត និងមីស៊ីលលើអ៊ីស្រាអែល ដើម្បីគាំទ្រសម្ព័ន្ធមិត្តហាម៉ាស់ប៉ាឡេស្ទីននៅតំបន់ហ្កាហ្សាស្រ្ទីប ក្រោយការវាយប្រហាររបស់ពួកគេ លើតំបន់សហគមន៍ភាគខាងត្បូងអ៊ីស្រាអែល កាលពីថ្ងៃទី ៧ ខែតុលា ឆ្នាំ ២០២៣ ។

សម្រាប់អ្នកស្រុកមួយចំនួន ការបញ្ចប់ការផ្ទុះអាវុធឆ្លងកាត់ព្រំដែនបានអនុញ្ញាតឲ្យពួកគេវិលត្រឡប់មកកាន់ផ្ទះរបស់ពួកគេវិញ ប៉ុន្តែអ្នកស្រុកខ្លះទៀត និយាយថា ពួកគេបានត្រឹមតែមកមើលសិន ហើយនៅមិនទាន់ផ្លាស់មករស់នៅនោះទេ រហូតដល់ពួកគេត្រូវបានធានាថា ការគំរាមកំហែងលើសន្តិសុខរបស់ពួកគេ លែងមានទៀតហើយ ៕