មន្រ្តីអង្គការសុខភាពពិភពលោក(WHO) បានបង្ហាញសុទិដ្ឋិនិយមថា មន្ទីរពេទ្យមួយចំនួននៅក្នុងប្រទេសលីបង់ដែលបានបិទអំឡុងជម្លោះរយៈពេលជាង ១ឆ្នាំកន្លងមកនេះ នឹងប្រតិបត្តិការឡើងវិញក្នុងពេលឆាប់ៗខាងមុខនេះ បើសិនជាបទឈប់បាញ់នៅតែរក្សា ។

លោក Abdinasir Abubakar គឺជាអ្នកតំណាង WHOប្រចាំលីបង់ បាននិយាយប្រាប់សន្និសីទសារព័ត៌មានតាមអនឡាញ ក្រោយវាយតម្លៃការខូចខាតក្នុងសប្តាហ៍នេះថា ប្រហែលជាមន្ទីរពេទ្យរបស់ពួកយើងមួយចំនួន ត្រូវការពេលវេលា ប៉ុន្តែមន្ទីរពេទ្យមួយចំនួនទៀត ប្រហែលជាអាចចាប់ផ្តើមភ្លាមៗ ។

លោកបន្តថា ពួកយើងសង្ឃឺមបែបនេះ ហើយមន្ទីរពេទ្យ ៤កន្លែងនៅក្នុង និងជុំវិញទីក្រុងបេរូត ស្ថិតក្នុងចំណោមមន្ទីរពេទ្យដែលអាចចាប់ផ្តើមដំណើរការឡើងវិញភ្លាមៗបាន ។

គួរឲ្យដឹងថា បទឈប់បាញ់រវាងអ៊ីស្រាអែល និងក្រុមហេសបូឡា បានចូលជាធរមានកាលពីព្រឹកថ្ងៃពុធ ក្រោមកិច្ចព្រមព្រៀងរៀបចំឡើងដោយសហរដ្ឋអាមេរិក និងបារាំង ដែលមានគោលដៅអនុញ្ញាតឲ្យពលរដ្ឋនៅភាគីប្រទេសទាំង ២ ចាប់ផ្តើមវិលត្រឡប់ទៅកាន់ផ្ទះសម្បែងរបស់ពួកគេវិញនៅតាមតំបន់ព្រំដែន ក្រោយសង្រ្គាមអស់រយៈពេល ១៤ខែ ។

ថ្លែងនៅក្នុងសន្និសីទសារព័ត៌មានតាមអនឡាញតែមួយ ប្រធានកម្មវិធីសង្រ្គោះបន្ទាន់របស់ WHOលោក Mike Ryan បានអំពាវនាវឲ្យមានបទឈប់បាញ់នៅតំបន់ហ្កាហ្សា ស្របពេលដែលស្ថានភាពស្ថិតក្នុងគ្រោះថ្នាក់ខ្លាំង ហើយប្រព័ន្ធសុខភាព ស្ថិតក្រោមសំពាធដ៏ធ្ងន់ធ្ងរ ៕