វាយ​កូន​បាល់៖ ​កីឡាករ​-​កីឡាការិនី​វាយ​កូន​បាល់​ដែល​មិនទាន់បាន​ចាក់​វ៉ាក់សាំង​ប្រឆាំង​កូ​វីដ​-១៩ នៅតែ​ត្រូវបាន​អនុញ្ញាតឱ្យ​ប្រកួត​នៅ​ព្រឹត្តិការណ៍ Grand Slam, Australian Open តែ​ត្រូវ​ប្រឈម​នឹង​វិធានការ​សុខាភិបាល​តឹងរ៉ឹង​។​ ​​កន្លងមក​បើតាម​ការបញ្ជាក់​របស់​រដ្ឋបាល​រដ្ឋ Victoria ប្រទេស​អូស្ត្រាលី​លោក Daniel Andrews ឱ្យដឹងថា លោក​មិន​គិតថា​អ្នកចូលរួម​នៅក្នុង​ព្រឹត្តិការណ៍ Australian Open អាចមក​កាន់​ទីក្រុង​ប្រកួត​បានឡើយ​ ប្រសិន​ពួកគេ​មិនបាន​ចាក់​វ៉ាក់សាំង​គ្រប់​ចំនួន​នោះទេ​។​

​​តែ​ក្រោយមក​បន្ទាប់ពី​មានការ​ជជែក​គ្នា ជាមួយ​សមាគម​កីឡា​វាយ​កូន​បាល់​អន្តរជាតិ​ក៏មាន​ការសម្របសម្រួល​ឡើងវិញ​។ ​​បើតាម ATP កីឡាករ​វាយ​កូន​បាល់​ប្រមាណ ៣៥% នៅ​មិនទាន់បាន​ចាក់​វ៉ាក់សាំង​នៅឡើយ​។ ​សូម​បញ្ជាក់ដែរថា កីឡាករ​លំដាប់​លេខ ១ ពិភពលោក Novak Djokovic សប្តាហ៍​មុន​បាន​បដិសេធ​មិន​បង្ហាញថា ​ខ្លួន​បាន​ចាក់​វ៉ាក់សាំង​រឺក៏​អត់ ហើយ​ក៏បាន​បង្ហើប​ថា​មិនទាន់​ច្បាស់​ថា ​នឹងចូលរួម​ការពារ​តំណែង​ជើងឯក​របស់ខ្លួន រឺក៏​អត់​ផងដែរ​។ ​​ម្ចាស់​ជើងឯក Grand Slam ២០លើក​រូបនេះ​បាន​និយាយ​ក្នុង​កិច្ចសម្ភាសន៍​នៅ​ប្រទេស​ស៊ែ​ប​ថា ការចាក់​វ៉ាក់សាំង រឺក៏​អត់​គឺជា​រឿង​ផ្ទាល់ខ្លួន​របស់គេ មិនចាំបាច់​ត្រូវ​និយាយ​ជា​សាធារណ​នោះឡើយ​។ ​ព្រឹត្តិការណ៍ Grand Slam, Australian Open នឹង​ចាប់ផ្តើម​នៅ​ខែមករា ​ឆ្នាំ២០២២៕

​អត្ថបទ​៖​នាង សុភា​វុ​ធ