គ្រូពេទ្យបឋមបាននៅកន្លែងកើតហេតុនៃការបាញ់ប្រហារជិតការតាំងលំនៅនិគមន៍ Ariel របស់ជនជាតិជ្វីហ្វ ស្ថិតក្នុងតំបន់កាន់កាប់វ៉េសប៊ែង ក្រោយបុរសម្នាក់ បាញ់ប្រហារលើរថយន្តក្រុងអ៊ីស្រាអែលមួយគ្រឿង បណ្តាលឲ្យមនុស្សយ៉ាងហោច ៨នាក់ រងរបួស មុនពេលគាត់ត្រូវបានបាញ់សម្លាប់ដោយទាហានអ៊ីស្រាអែល ។ នេះបើយោងតាមការអះអាងរបស់យោធា និងសេវាកម្មសង្រ្គោះបន្ទាន់ បានឲ្យដឹងនៅថ្ងៃសុក្រនេះ ។

សេវាកម្មសុខភាព MDA របស់អ៊ីស្រាអែល បាននិយាយថា មនុស្ស ៤នាក់ បានរងរបួសដោយសារគ្រាប់កាំភ្លើង ក្នុងនោះមនុស្ស ៣នាក់ ស្ថិតក្នុងស្ថានភាពធ្ងន់ធ្ងរ ខណៈដែលមនុស្ស ៤នាក់ផ្សេងទៀត រងរបួសដោយសារត្រូវអំបែងកែវហោះ ។

នៅមិនទាន់មានព័ត៌មានបឋមនោះទេ ពីអត្តសញ្ញាណរបស់ជនវាយប្រហារ ។

សូមបញ្ជាក់ថា អំពើហិង្សា បានកើនឡើងនៅទូទាំងតំបន់វ៉េសប៊ែង ចាប់តាំងពីផ្ទុះឡើងសង្រ្គាមរវាងក្រុមហាម៉ាស់ និងអ៊ីស្រាអែល កាលពីខែតុលា ឆ្នាំមុន ៕