អគ្គស្នងការនគរបាលជាតិអាហ្វ្រិកខាងត្បូងលោក Senzo Mchunu បានសន្យាសង្រ្គោះមនុស្សទាំងអស់ដែលនៅជាប់ខ្លួនក្នុងអណ្តូងរ៉ែមាសគេបោះបង់ចោល ស្ថិតនៅទីក្រុងភាគពាយ័ព្យ Stilfontein ឲ្យបានឆាប់រហ័សតាមដែលអាចធ្វើទៅបាន ហើយនិងសន្យាទប់ស្កាត់ការជីករ៉ែខុសច្បាប់ ។

នៅក្នុងបទសម្ភាសន៍ជាមួយកាសែត Al Jazeera នាថ្ងៃសុក្រនេះ លោក Senzo និយាយថា ចំនួនពិតប្រាកដរបស់មនុស្សជាប់ខ្លួនក្រោមដី នៅមិនទាន់ដឹងច្បាស់នោះទេ ។

ក្រុមអាជ្ញាធរ បានឈរជើងអស់រយៈពេលជាច្រើនសប្តាហ៍មកហើយ នៅក្រៅអណ្តូងរ៉ែគេបោះបង់ចោលក្នុងទីក្រុង Stilfontein ដែលស្ថិតនៅចម្ងាយប្រហែល ១៥០គ.មភាគនិរតីទីក្រុង Johannesburg ដោយពួកគេរារាំងអ្នកស្រុកពីការបញ្ជូនចំណីអាហារ និងទឹកចុះក្រោម ដើម្បីព្យាយាមបង្ខំឲ្យកម្មករអណ្តូងទាំងនោះ ចេញមកក្រៅវិញ ។

ប្រតិបត្តិការរបស់នគរបាល បានធ្វើឲ្យមានការខឹងសម្បារយ៉ាងខ្លាំងនៅក្នុងចំណោមអ្នកស្រុកដែលព្រួយបារម្ភថា មនុស្សប្រុសនៅក្រោមដីទាំងអស់នោះ អាចនឹងអត់ឃ្លាន ឬសូម្បីតែស្លាប់នៅក្រោមដី ។

ដំបូងឡើយ នគរបាលចង្អុរបង្ហាញថា កម្មករអណ្តូងរ៉ែរហូតដល់ ៤ពាន់នាក់ អាចនឹងជាប់ខ្លួន ប៉ុន្តែកាលពីថ្ងៃព្រហស្បតិ៍ អ្នកនាំពាក្យនគរបាលអាហ្វ្រិកខាងត្បូងលោក Athlenda Mathe និយាយថា ពួកគេជឿថា ចំនួននេះ ត្រូវបានបំផ្លើសប៉ុណ្ណោះ ហើយពួកគេជឿថា មានកម្មករអណ្តូងរ៉ែចន្លោះពី ៣៥០ ទៅ ៤០០នាក់ប៉ុណ្ណោះ ជាប់ខ្លួននៅក្រោមដី ៕