បាល់ទាត់៖ យុវជនអាយុក្រោម ១៥ឆ្នាំសរុបចំនួន ៥៥៨នាក់បានដាក់ពាក្យចូលរួមធ្វើតេស្ដដើម្បីក្លាយជាសមាជិកអាយុក្រោម ១៥ឆ្នាំក្លិបបឹងកេតអេហ្វស៊ី។ ការធ្វើតេស្ដនេះមានរយៈពេល ៤ថ្ងៃ និងបែងចែកជា ៧វគ្គនៅកីឡដ្ឋានខេមបូឌាអ៊ែរវ៉េ។
តាមការអះអាងលើបណ្ដាញសង្គមរបស់ក្លិប មានមូលដ្ឋាននៅតំបន់បឹងស្នោរខណ្ឌច្បារអំពៅនេះបានឲ្យដឹងថា ការធ្វើតេស្ដបានចាប់ផ្ដើមពីថ្ងៃទី២៥ ខែតុលាម្សិលមិញរហូតដល់ថ្ងៃទី២៨ ខែតុលាខាងមុខ ដោយមានការបែងចែកជាក្រុមៗដើម្បីងាយស្រួលក្នុងការគ្រប់គ្រង ពោលគឺក្នុង ១ថ្ងៃធ្វើតេស្ដ ២ដងពេលព្រឹក និងពេលល្ងាច។ លើសពីនេះដើម្បីសុវត្ថិភាព និងចូលរួមទប់ស្កាត់ការរីករាលនៃជំងឺកូវីដ-១៩ ក្លិបក៏បានអនុវត្តនូវវិធានការសុខាភិបាលដោយការវាស់កម្ដៅ និងបាញ់អាល់កុលដល់យុវជនគ្រប់រូប មុនអនុញ្ញាតឲ្យពួកគេចូលធ្វើតេស្ដទៀតផង។
ក្លិបជើងឯកលីគ ៤សម័យនេះបានបន្ថែមថា នេះគឺជាដំណាក់កាលដំបូងនៃការធ្វើតេស្ដប៉ុណ្ណោះ ដើម្បីជ្រើសរើសយុវជនត្រៀមចូលរួមការប្រកួតពានរង្វាន់យុវជន របស់សហព័ន្ធកីឡាបាល់ទាត់កម្ពុជានាពេលដ៏ខ្លីខាងមុខ។ ប៉ុន្ដែចំពោះយុវជនដែលមិនបានដាក់ពាក្យទាន់ពេលវេលា ឬនៅតាមខេត្ត ក្លិបនឹងធ្វើការប្រកាសជ្រើសរើសជាបន្ដបន្ទាប់នាពេលក្រោយទៀត៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
