ប្រភពព័ត៌មានយោធាចំនួនបី បានប្រាប់សារព័ត៌មានរ៉យទ័រថា អាជ្ញាធរប្រទេសស៊ីរី បានបិទអាកាសយានដ្ឋានទីក្រុងអាឡិបប៉ូ ព្រមទាំងផ្លូវទាំងអស់ដែលចូលទៅកាន់ទីក្រុង នៅថ្ងៃសៅរ៍ ទី ៣០ ខែវិច្ឆិកានេះ ខណៈក្រុមឧទ្ទាមប្រឆាំងប្រធានាធិបតី លោក Bashar al-Assad បាននិយាយថា ក្រុមឧទ្ទាមបានចូលទៅដល់បេះដូងនៃទីក្រុងអាឡិបប៉ូ។

ក្រុមអ្នកប្រយទ្ធប្រឆាំង ដឹកនាំដោយក្រុមសកម្មប្រយុទ្ធ Hayat Tahrir al-Sham បានវាយប្រហារដ៏គួរឱ្យភ្ញាក់ផ្អើល នៅទូទាំងទីក្រុងគ្រប់គ្រងដោយរដ្ឋាភិបាល ក្នុងសប្តាហ៍នេះ ហើយបានចូលទៅដល់ទីក្រុងអាឡិបប៉ូ បន្ទាប់ពីត្រូវបានបង្ខំឱ្យចាកចេញពីទីក្រុងភាគខាងជើងប្រទេសស៊ីរី។

ប្រភពព័ត៌មានយោធាចំនួនពីរ បាននិយាយថា ប្រទេសរុស្ស៊ី ដែលជាសម្ព័ន្ធមិត្តដ៏សំខាន់របស់លោក Assad បានសន្យាថានឹងផ្តល់ជំនួយយោធាបន្ថែមដល់ក្រុងដាម៉ាស(Damascus) ដើម្បីរារាំងក្រុមឧទ្ទាម ហើយជំនួយថ្មីនឹងចាប់ផ្តើមទៅដល់ក្នុងរយៈពេល៧១ម៉ោងខាងមុខនេះ។ 

កងទ័ពស៊ីរី ត្រូវបានគេប្រាប់ឱ្យធ្វើតាមបទបញ្ជា «ដកទ័ពដោយសុវត្ថិភាព» ពី តំបន់សំខាន់ៗនៃទីក្រុងដែលក្រុមឧទ្ទាមបានចូលទៅដល់។

ការប្រយុទ្ធគ្នាខ្លាំង នៅភាគពាយព្យប្រទេសស៊ីរីក្នុងរយៈពេលបីថ្ងៃចុងក្រោយនេះ រវាងកងកម្លាំងរដ្ឋាភិបាល និងក្រុមឧទ្ទាម បានសម្លាប់ជនស៊ីវិល២៧នាក់ រួមទាំងកុមារ។ មន្ត្រីអង្គការសហប្រជាជាតិ បានចាត់ទុកអំពើហិង្សា ដែលកំពុងកើតឡើងនៅក្នុងប្រទេសស៊ីរី ថា «គួរឱ្យព្រួយបារម្ភខ្លាំង»។

ក្រុមឧទ្ទាម បានបើកការវាយលុកចូលទៅក្នុងទីប្រជុំជននិងភូមិរាប់សិប ក្នុងទីក្រុងអាឡិបប៉ូ ភាគពាយ័ព្យដែលគ្រប់គ្រងដោយរដ្ឋាភិបាលរបស់ប្រធានាធិបតីស៊ីរី លោក បាសា អាល់ អាសាដ។