នៅពេលមីស៊ីលរបស់រុស្សី ត្រូវបានបាញ់សំដៅទៅលើរោងចក្រថាមពលអគ្គិសនីរបស់អ៊ុយក្រែន បុគ្គលិកនៅរោងចក្រ បានបន្តធ្វើការនៅក្នុងបន្ទប់គ្រប់គ្រង ដែលត្រូវបានការពារដោយបាវខ្សាច់ដើម្បីរក្សាបណ្តាញឲ្យនៅដំណើរការ។ 

រោងចក្រនេះ មន្ត្រីថាមពលនៅទីតាំងបានស្នើសុំសារព័ត៌មាន Reuters កុំឱ្យកំណត់អត្តសញ្ញាណ សម្រាប់ហេតុផលសុវត្ថិភាព ជាកន្លែងដែលត្រូវបានវាយលុកដោយមីស៊ីលនៅឆ្នាំនេះ។ 

ការវាយប្រហារដោយមីស៊ីល បានបណ្តាលឲ្យមានរន្ធនៅក្នុងជញ្ជាំង ហើយឧបករណ៍បានខូចខាត និងរាយប៉ាយ។ ទឹក បានស្រក់ពីលើដំបូលដែលរងការបំផ្លាញដោយបំណែកគ្រាប់រ៉ុក្កែត។ 

រោងចក្រនេះជាធម្មតាផ្តល់អគ្គិសនី និងថាមពលកម្តៅដល់ប្រជាជនរាប់សែននាក់។ វាគឺជារោងចក្រថាមពលកម្តៅមួយក្នុងចំណោមរោងចក្រថាមពលកម្តៅចំនួន៥ ដែលនៅសល់ក្នុងដំណើរការ គ្រប់គ្រងដោយក្រុមហ៊ុន DTEK ជាក្រុមហ៊ុនផ្តល់ថាមពលឯកជនធំបំផុតរបស់ប្រទេសអ៊ុយក្រែន។

យោងតាមប្រតិបត្តិករបណ្តាញអគ្គិសនីជាតិ Ukrenergo បាននិយាយឲ្យដឹងថា ការវាយប្រហាររបស់រុស្ស៊ីកាលពីប៉ុន្មានថ្ងៃកន្លងទៅនេះ មានការដាច់ចរន្តអគ្គិសនីនៅក្នុងទីក្រុងគីវ(Kyiv), Odesa, Dnipro និងទីក្រុង Donetsk ខណៈសីតុណ្ហភាពនៅទូទាំងប្រទេស បានធ្លាក់ចុះដល់ប្រហែល០អង្សាសេ។